ఎల్బీనగర్ : ర్రానున్న రోజుల్లో భారీ వర్షాలు కురిసే అవకాశం ఉన్న నేపథ్యంలో ప్రజలకు ఎలాంటి ఇబ్బందులు కలగకుండా ముందస్తు చర్యలు చేపట్టాలని ఎల్బీనగర్ డీసీపీ అనురాధ (ఐపీఎస్) అధికారులను ఆదేశించారు. సోమవారం ఉదయం వనస్థలిపురం ఏసీపీ కాశిరెడ్డి, ట్రాఫిక్ డీసీపీ శ్రీనివాస్, ట్రాఫిక్ ఏసీపీ నవీన్ రెడ్డితో కలిసి వనస్థలిపురం పోలీస్‌స్టేషన్ పరిధిలోని వాటర్‌లాగింగ్ ప్రాంతాలను ఆమె పరిశీలించారు.

ఈ సందర్భంగా వర్షపు నీరు నిల్వ ఉండే ప్రాంతాలను గుర్తించి, నీటి నిల్వల కారణంగా ప్రజలకు ఇబ్బందులు తలెత్తకుండా తక్షణ చర్యలు చేపట్టాలని సూచించారు. సమస్యాత్మక ప్రాంతాల్లో అవసరమైన యంత్రాంగం, సిబ్బందిని అందుబాటులో ఉంచి అత్యవసర పరిస్థితులను సమర్థంగా ఎదుర్కొనేలా ఏర్పాట్లు చేయాలని ఆదేశించారు.

ప్రజల రాకపోకలకు అంతరాయం కలగకుండా, ట్రాఫిక్ సమస్యలు తలెత్తకుండా ప్రత్యేక చర్యలు తీసుకోవాలని సంబంధిత అధికారులకు సూచించారు. కార్యక్రమంలో వనస్థలిపురం ఎస్‌హెచ్‌వో రవిబాబు, ట్రాఫిక్ ఇన్‌స్పెక్టర్ శ్రీనివాస్‌తో పాటు లా అండ్ ఆర్డర్, ట్రాఫిక్ విభాగాల సిబ్బంది పాల్గొన్నారు.