సదాశివపేటలోని స్థానిక పౌరసరఫరాల గోదాం వద్ద బీఆర్‌టీయూ అనుబంధ సివిల్ సప్లై హమాలి యూనియన్ ఆధ్వర్యంలో శుక్రవారం మేడే వేడుకలు ఘనంగా నిర్వహించారు. కార్యక్రమానికి ముఖ్య అతిథిగా హాజరైన సంగారెడ్డి ఎమ్మెల్యే చింతా ప్రభాకర్ మాట్లాడుతూ దేశ సంపదను సృష్టించేది కార్మికుల శ్రమేనని, వారి త్యాగాలు అమూల్యమని పేర్కొన్నారు. కార్మికులు ఉత్పత్తి రంగంలో కీలక పాత్ర పోషిస్తూ దేశాభివృద్ధికి బలంగా నిలుస్తున్నారని అన్నారు. అనంతరం బీఆర్‌టీయూ రాష్ట్ర ఉపాధ్యక్షుడు ఎస్‌కే బాబు మియా మాట్లాడుతూ మేడే కార్మికుల హక్కుల సాధనకు ప్రతీకగా నిలిచిన చారిత్రక దినమని, కార్మికుల పోరాటాల ఫలితంగానే నేటి హక్కులు, 8 గంటల పని విధానం సాధ్యమయ్యాయని తెలిపారు. కార్యక్రమంలో పలువురు నాయకులు, హమాలి కార్మికులు పాల్గొన్నారు.