ఏలూరు జిల్లా నూజివీడు నియోజకవర్గం ముసునూరు మండలం సూరేపల్లి గ్రామంలో గుట్ట పోరంబోకు భూముల విషయంలో వచ్చిన ఆరోపణల నేపథ్యంలో మంగళవారం గ్రామంలో ప్రత్యేక సమావేశం నిర్వహించారు.

ఈ సందర్భంగా గ్రామంలో కొందరు ఎకరానికి రూ.10,000 చొప్పున వసూలు చేసి, ఆ మొత్తాన్ని పట్టాల ఖర్చులకు లేదా విద్యా కార్యక్రమాలకు వినియోగించాలని చెప్పినట్టు ఆరోపణలు వెలుగులోకి వచ్చాయి. ఈ అంశంపై గ్రామస్థుల నుంచి ఫిర్యాదులు అందడంతో అధికారులు, ప్రజాప్రతినిధులు సమావేశమై విషయాన్ని పరిశీలించారు.

ఈ విషయం మంత్రి పార్థసారధి దృష్టి కి వెళ్ళగా మంత్రి మాట్లాడుతూ, ఇలాంటి అక్రమ వసూళ్లు ఎక్కడ జరిగినా ప్రభుత్వం సహించబోదని స్పష్టం చేశారు. భూముల విషయంలో ప్రజలను మోసం చేయడం, అక్రమంగా డబ్బులు వసూలు చేయడం తీవ్రమైన తప్పిదమని పేర్కొన్నారు.

ఈ వ్యవహారంలో ఎవరైనా తప్పు చేసినట్లు తేలితే, వారి పై చట్టపరమైన కఠిన చర్యలు తీసుకుంటామని మంత్రి హెచ్చరించారు. ప్రజలు కూడా ఇలాంటి అక్రమాలకు లొంగకుండా వెంటనే అధికారులకు సమాచారం అందించాలని సూచించారు.

ఈ సమావేశంలో సంబంధిత అధికారులు, గ్రామ పెద్దలు, స్థానిక నాయకులు పాల్గొన్నారు.