భక్తులతో కిక్కిరిసిన దేవస్థానం.. ప్రత్యేక పూజలు, బోనాలతో సందడి

సూర్యాపేట మండల పరిధిలోని టేకుమట్ల గ్రామంలో ప్రతి రెండేళ్లకు ఒకసారి అత్యంత భక్తిశ్రద్ధలతో నిర్వహించే శ్రీశ్రీశ్రీ చౌడమ్మ తల్లి–లింగమంతుల స్వామి జాతర సోమవారం ఘనంగా ప్రారంభమైంది. గ్రామమంతా ఆధ్యాత్మిక వాతావరణంతో నిండిపోగా, భక్తుల జయజయధ్వానాలతో దేవస్థానం పరిసరాలు మార్మోగాయి.

యాదవుల కులదైవంగా ఆరాధించబడే చౌడమ్మ తల్లికి భక్తులు ప్రత్యేక పూజలు నిర్వహించి బోనాలు సమర్పించారు. అమ్మవారి దర్శనం కోసం భక్తులు పెద్ద ఎత్తున తరలివచ్చి మొక్కులు చెల్లించుకున్నారు.

మందగంపల ఊరేగింపులు, డీజే శబ్దాలు, సంప్రదాయ ఆటపాటల మధ్య జాతర ఉత్సాహభరితంగా కొనసాగింది. ఆధ్యాత్మికత, సంస్కృతి, సంప్రదాయాల సమ్మేళనంగా ఈ జాతర ప్రత్యేక ఆకర్షణగా నిలిచింది.

టేకుమట్ల గ్రామంతో పాటు పరిసర ప్రాంతాల నుంచి యాదవ సోదరులు పెద్ద సంఖ్యలో హాజరై జాతరను మరింత వైభవంగా నిర్వహించారు. ప్రతి రెండేళ్లకు ఒకసారి జరిగే ఈ మహోత్సవాన్ని భక్తులు ఎంతో ఆసక్తిగా ఎదురుచూస్తూ అమ్మవారిని దర్శించుకుని తమ కోరికలను తెలియజేసుకుంటున్నారు.

జాతర సందర్భంగా గ్రామంలో భక్తిశ్రద్ధలు ఉప్పొంగగా, ఆధ్యాత్మిక ఆనందం వెల్లివిరిసింది. చౌడమ్మ తల్లి ఆశీస్సులతో గ్రామ ప్రజలు సుఖసంతోషాలతో ఉండాలని భక్తులు ప్రార్థించారు.