నారాయణఖేడ్ నియోజకవర్గం పరిధిలో విద్యుత్ శాఖ మరియు గ్రామీణ నీటి సరఫరా శాఖ అధికారులతో శాసనసభ్యుడు డాక్టర్ పట్లోళ్ల సంజీవరెడ్డి ప్రత్యేక సమీక్ష సమావేశం నిర్వహించాడు. మండలంలోని గ్రామాల్లో ఉన్న విద్యుత్ సమస్యలు, తాగునీటి ఇబ్బందులపై అధికారులతో సుదీర్ఘంగా చర్చించి తక్షణ చర్యలు తీసుకోవాలని సూచించాడు.ఎండకాలం నేపథ్యంలో ఏ గ్రామంలోనూ తాగునీటి కొరత రాకుండా చూడాలని, పైపులైన్ లీకేజీలను వెంటనే సరిచేయాలని, అవసరమైతే కొత్త బోర్లు త్రవ్వించి లేదా ట్యాంకర్ల ద్వారా నీటి సరఫరా చేయాలని ఆదేశించాడు. విద్యుత్ కోతలు లేకుండా నిరంతర సరఫరా కల్పించాలని, వ్యవసాయం మరియు గృహ అవసరాలకు నాణ్యమైన విద్యుత్ అందించాలని స్పష్టం చేశాడు. ఎక్కడైనా లూజ్ వైర్లు, ట్రాన్స్‌ఫార్మర్ సమస్యలు ఉంటే వెంటనే పరిష్కరించాలని తెలిపాడు.ప్రజల నుంచి వచ్చే ఫిర్యాదులపై తక్షణ స్పందన ఇవ్వాలని, క్షేత్రస్థాయిలో సమస్యలను గుర్తించి సకాలంలో పరిష్కారం చూపాలని అధికారులకు సూచించాడు. ప్రజలకు మెరుగైన సేవలు అందించడం ప్రభుత్వ లక్ష్యమని, ఇందులో నిర్లక్ష్యం చేయవద్దని పేర్కొన్నాడు.ఈ సమావేశంలో విద్యుత్ శాఖ, గ్రామీణ నీటి సరఫరా శాఖ అధికారులు మరియు ప్రజాప్రతినిధులు పాల్గొన్నారు.