రోస్టర్ పాయింట్లలో అన్యాయం జరిగిందని ఆవేదన.. సవరణ వరకు ఉద్యోగ నోటిఫికేషన్లు నిలిపివేయాలని డిమాండ్

నల్గొండ, ఆగస్టు 01,

ఎస్సీ వర్గీకరణ అమలు కోసం రాష్ట్ర ప్రభుత్వం జారీ చేసిన జీఓలను తక్షణమే రద్దు చేయాలని కోరుతూ మాల మహానాడు ప్రతినిధులు శనివారం రాష్ట్ర రోడ్లు, భవనాలు, సినిమాటోగ్రఫీ శాఖ మంత్రి కోమటిరెడ్డి వెంకట్‌రెడ్డిని నల్గొండలో కలిసి వినతిపత్రం సమర్పించారు. వర్గీకరణ అమలు వల్ల మాల సామాజిక వర్గానికి తీవ్ర అన్యాయం జరుగుతోందని, రోస్టర్ పాయింట్ల కేటాయింపులో లోపాల కారణంగా ఉద్యోగ అవకాశాలు కోల్పోతున్నారని మంత్రి దృష్టికి తీసుకెళ్లారు.

మాల మహానాడు జాతీయ అధ్యక్షుడు తాళ్లపల్లి రవి మాట్లాడుతూ.. రాష్ట్ర ప్రభుత్వం అమలు చేస్తున్న ఎస్సీ రిజర్వేషన్ల హేతుబద్ధీకరణ చట్టం–2025, దానికి సంబంధించిన జీఓల వల్ల మాలలు, వారి 25 ఉపకులాలకు నష్టం జరుగుతోందని ఆరోపించారు. 100 పాయింట్ల రోస్టర్‌లో ప్రారంభ పాయింట్లలో మాలలకు అవకాశం కల్పించకపోవడంతో చిన్న, మధ్యస్థాయి ఉద్యోగ నియామకాల్లో ప్రాతినిధ్యం లేకుండా పోతోందని తెలిపారు.

'రిజర్వేషన్ ఉన్నా.. ఉద్యోగం దక్కని పరిస్థితి'

పోలీసు శాఖతో పాటు ఇతర ప్రభుత్వ విభాగాల్లో 5 నుంచి 15 పోస్టులతో వెలువడే నియామకాల్లో మాల అభ్యర్థులకు ఒక్క పోస్టు కూడా దక్కే అవకాశం లేకుండా పోతోందని పేర్కొన్నారు. ఇది రాజ్యాంగం కల్పించిన సమాన అవకాశాల స్ఫూర్తికి విరుద్ధమని అభిప్రాయపడ్డారు.

మూడు ప్రధాన డిమాండ్లు

ఎస్సీ వర్గీకరణకు సంబంధించిన జీఓలను వెంటనే రద్దు చేయాలి.

రోస్టర్ పాయింట్లను పునఃపరిశీలించి ప్రారంభ పాయింట్లలో మాలలకు తగిన ప్రాతినిధ్యం కల్పించాలి.

రోస్టర్ సవరణ పూర్తయ్యే వరకు అన్ని ఉద్యోగ నోటిఫికేషన్లను నిలిపివేయాలి.

వినతిపత్రంలోని అంశాలను ముఖ్యమంత్రి దృష్టికి తీసుకెళ్లి పరిశీలిస్తానని మంత్రి కోమటిరెడ్డి వెంకట్‌రెడ్డి హామీ ఇచ్చినట్లు మాల మహానాడు నాయకులు తెలిపారు.

ఈ కార్యక్రమంలో రాష్ట్ర ప్రధాన కార్యదర్శి చింతపల్లి లింగమయ్య, రాష్ట్ర కార్యదర్శి ఎన్నమల్ల అనిల్, రాష్ట్ర ఉపాధ్యక్షుడు చింతపల్లి బాలకృష్ణ, రాష్ట్ర కమిటీ సభ్యుడు చింతపల్లి వెంకన్న, విద్యార్థి సంఘం జిల్లా ప్రధాన కార్యదర్శి చిలుకూరి అభినవ్, జిల్లా నాయకులు అనుముల పూరి సుధాకర్, రావిరాల వరప్రసాద్, బోగరి రవీందర్, ఎర్నమల్ల ప్రభాకర్‌తో పాటు మాల సంక్షేమ సంఘాల ప్రతినిధులు పాల్గొన్నారు.