హనుమకొండ, ఆగస్టు 1: సోషల్ మీడియా ద్వారా మహిళలతో పరిచయాలు పెంచుకుని ఓ యువతిని మోసం చేసి, లైంగిక వేధింపులు, బెదిరింపులకు పాల్పడిన ఎస్‌ఐ కదిరే శ్రీకాంత్ను సుబేదారి పోలీసులు అరెస్ట్ చేశారు. ఈ విషయాన్ని సీఐ రంజిత్ కుమార్ వెల్లడించారు.

హైదరాబాద్‌కు చెందిన బాధితురాలు ఇచ్చిన ఫిర్యాదు మేరకు కేసు నమోదు చేసిన పోలీసులు దర్యాప్తు చేపట్టి, నిందితుడిని నిజామాబాద్‌లో అదుపులోకి తీసుకున్నారు. అనంతరం కోర్టులో హాజరుపరచగా, హనుమకొండ మూడో అదనపు న్యాయస్థానం అతనికి 14 రోజుల రిమాండ్ విధించింది.

ఈ సందర్భంగా సీఐ రంజిత్ కుమార్ మాట్లాడుతూ, సోషల్ మీడియాలో అపరిచితులతో పరిచయాలు పెంచుకునే విషయంలో మహిళలు అప్రమత్తంగా ఉండాలని సూచించారు. అనుమానాస్పద ఘటనలు ఎదురైతే వెంటనే పోలీసులకు సమాచారం అందించాలని కోరారు.