భువనగిరి: స్పెషల్ ఇంటెన్సివ్ రివిజన్ (SIR) మ్యాపింగ్ ప్రక్రియను విజయవంతంగా పూర్తిచేయడానికి రాజకీయ పార్టీల ప్రతినిధులు పూర్తి సహకారం అందించాలని జిల్లా కలెక్టర్ అనురాగ్ జయంతి సూచించారు.

మంగళవారం మినీ మీటింగ్ హాల్‌లో నిర్వహించిన సమన్వయ సమావేశంలో కలెక్టర్, రెవెన్యూ అదనపు కలెక్టర్ వెంకారెడ్డి, వివిధ గుర్తింపు పొందిన రాజకీయ పార్టీల ప్రతినిధులు పాల్గొన్నారు.

ఈ సందర్భంగా కలెక్టర్ మాట్లాడుతూ జిల్లాలో ఎస్ఐఆర్ మ్యాపింగ్ ప్రక్రియను పారదర్శకంగా, ఖచ్చితంగా నిర్వహించేందుకు బూత్ లెవెల్ ఏజెంట్ల జాబితాలను వెంటనే సమర్పించాలని సూచించారు. క్షేత్రస్థాయిలో బూత్ లెవెల్ అధికారులు సమర్థవంతంగా పని చేయడానికి రాజకీయ పార్టీల సహకారం అవసరమన్నారు.

త్వరలో నిర్వహించనున్న ఎస్ఐఆర్ ప్రక్రియపై వివరాలు తెలియజేస్తూ, బూత్ లెవెల్ ఆఫీసర్లు ప్రతి ఇంటికి వెళ్లి ఓటర్ల వివరాలు సేకరిస్తారని తెలిపారు. ఎన్యూమరేటర్ ఫారమ్ ద్వారా సమాచారం నమోదు చేసి, ఒక ప్రతిని ఓటరుకు అందజేస్తారని వివరించారు.

ఈ సమావేశంలో ఎన్నికల విభాగం సూపరింటెండెంట్, వివిధ రాజకీయ పార్టీల ప్రతినిధులు పాల్గొన్నారు.