అనాజిపురంలో బ్రహ్మోత్సవాలకు సన్నాహాలు.. భక్తులకు విస్తృత ఏర్పాట్లు

యాదాద్రి భువనగిరి జిల్లా, భువనగిరి మండలం:

శతాబ్దాల చరిత్ర కలిగిన అనాజిపురం వోలేశ్వరం స్వయంభు శ్రీ లక్ష్మీనరసింహస్వామి దేవాలయంలో స్వామివారి తిరుకళ్యాణ మహోత్సవం ఏప్రిల్ 2న నిర్వహించనున్నారు. చారిత్రాత్మక మహిమాన్విత దేవాలయంలో జరగనున్న చతుర్వార్షిక బ్రహ్మోత్సవాలకు గ్రామ పెద్దలు, దేవస్థాన కమిటీ సభ్యులు ఏర్పాట్లు చేస్తున్నారు.

ఈ సందర్భంగా సోమవారం గ్రామ సర్పంచ్ రాయపురం సురేష్, ఉపసర్పంచ్ వెలిశాల మురళి ఆధ్వర్యంలో గ్రామ పెద్దలు సమావేశమై ఉత్సవాల నిర్వహణపై ప్రణాళికలు రూపొందించారు. భువనగిరి పట్టణానికి సమీపంలో ఉన్న ఈ దేవాలయానికి పరిసర గ్రామాల నుంచి భక్తులు అధిక సంఖ్యలో హాజరయ్యే అవకాశం ఉండడంతో అన్నదానం, ప్రసాదాలు, మంచినీటి సదుపాయం, రవాణా వంటి ఏర్పాట్లు చేయనున్నట్లు తెలిపారు.

నాటి పూర్వ వైభవాన్ని తిరిగి తీసుకురావాలనే ఉద్దేశంతో ఈసారి బ్రహ్మోత్సవాలను ఘనంగా నిర్వహించనున్నట్లు దేవస్థాన కమిటీ సభ్యులు తెలిపారు. ప్రత్యేక పూజలు, ఆలయ అవతార సేవలు సాంప్రదాయ పద్ధతుల ప్రకారం నిర్వహించనున్నట్లు వివరించారు.

ఈ సందర్భంగా గ్రామ పెద్దల సమక్షంలో పురోహితులు స్వామివారి బ్రహ్మోత్సవాల లగ్నపత్రికను సాంప్రదాయబద్ధంగా ఆవిష్కరించారు. చైత్ర శుద్ధ పౌర్ణమి సందర్భంగా గురువారం జరగనున్న బ్రహ్మోత్సవాలకు పరిసర గ్రామాల భక్తులు అధిక సంఖ్యలో పాల్గొని కార్యక్రమాన్ని విజయవంతం చేయాలని నిర్వాహకులు కోరారు.

కార్యక్రమంలో నీలం భిక్షపతి, గునుగుంట్ల శ్రీనివాస్, ఏదునూరి మల్లేష్, బొల్లేపల్లి మాణిక్యం, పిట్టల శ్రీశైలం, ఏదునూరి నరేష్, వెలిశాల కృష్ణ, బొల్లేపల్లి అశోక్, నీలం వెంకటేష్, నోముల వెంకటేష్, గోదా మల్లయ్య, గోగు పోశాలు, రాచమల్ల విజయకుమార్, తోటకూర మల్లేష్, ఏదునూరి నరసింహ తదితరులు పాల్గొన్నారు.