హుజూర్నగర్, : భారతదేశం లౌకిక దేశమై అన్ని మతాలను సమానంగా గౌరవించాల్సిన బాధ్యత ప్రభుత్వంపై ఉందని తెలంగాణ రాష్ట్ర క్రిస్టియన్ మైనారిటీ వెల్ఫేర్ అసోసియేషన్ రాష్ట్ర ప్రధాన కార్యదర్శి బిషప్ దుర్గం ప్రభాకర్ అన్నారు.

హుజూర్నగర్ మున్సిపాలిటీ పరిధిలోని చింతల బజారు అభిషేక్తుని ప్రార్థన మందిరంలో జిల్లా నాయకులు పాస్టర్ ఉటుకూరి రాజు ఆధ్వర్యంలో నిర్వహించిన ప్రెస్ మీట్‌లో ఆయన ముఖ్య అతిథిగా పాల్గొన్నారు.

ఈ సందర్భంగా మాట్లాడుతూ, దళిత క్రైస్తవులకు ఎస్సీ హోదా కల్పించడం రాజ్యాంగబద్ధమైన హక్కు అని పేర్కొన్నారు. 2004లో ఏర్పాటు చేసిన రంగనాథ్ మిశ్రా జాతీయ కమిషన్ 2007లో సమర్పించిన నివేదికలో దళిత క్రైస్తవులు వివక్షను ఎదుర్కొంటున్నారని స్పష్టంగా తెలిపిందని, ఆ నివేదికను కేంద్ర ప్రభుత్వం వెంటనే అమలు చేయాలని డిమాండ్ చేశారు.

1950 నాటి రాష్ట్రపతి ఉత్తర్వుల ద్వారా ఎస్సీ హోదాను హిందూ, సిక్కు, బౌద్ధ మతాలకు మాత్రమే పరిమితం చేయడం దళిత క్రైస్తవులకు అన్యాయం చేస్తున్నదని విమర్శించారు. ఇది రాజ్యాంగంలోని సమానత్వ హక్కులకు విరుద్ధమని పేర్కొన్నారు.

దేశంలో దళిత క్రైస్తవులు సామాజిక, ఆర్థిక, మానసిక ఇబ్బందులను ఎదుర్కొంటున్నారని, ఇతర కులాల వారు క్రైస్తవ మతంలోకి మారినా తమ కుల హోదాను కొనసాగించుకుంటున్నారని, అదే విధంగా దళిత క్రైస్తవులకు కూడా హక్కులు కల్పించాలని కోరారు.

దేశంలోని అన్ని రాజకీయ పార్టీలు ఈ అంశంపై తమ వైఖరిని వెల్లడించాలని, త్వరలోనే నాయకులను కలిసి వినతిపత్రాలు సమర్పిస్తామని తెలిపారు.

ఈ కార్యక్రమంలో బిషప్ ముల్లంగి జాకబ్ రాజు, రెవ. డా. మెసా దేవసహాయం, రెవ. డా. జలగం జేమ్స్, తలకప్పల దయాకర్, మాతంగి పీటర్, రెవ. బొక్క ఏలీయా రాజు, రెవ. డా. డి. జాన్ ప్రకాష్, రెవ. ఏర్పుల క్రిస్టోఫర్, రెవ. పంది మార్క్, పాస్టర్ కొండేటి లాజర్, పాస్టర్ ప్రేమ్ సాగర్, పిట్టల సామెల్, రెవ. సి. హెచ్. కిరణ్ కుమార్, రాపోలు పిలిఫ్, గుగులోత్ రవి నాయక్, కొత్తపల్లి జోసెఫ్, సంజీవ్ కుమార్, బండారు సొలొమోను, మామిడి కృష్ణ తదితరులు పాల్గొన్నారు.