చిట్యాల పట్టణ కేంద్రం 9వ వార్డ్‌కు చెందిన మునుగోటి వెంకన్న మరణం స్థానికంగా విషాదాన్ని నింపింది. ఈ క్రమంలో, ఆయనతో కలిసి చిట్యాల ZPHS పాఠశాలలో 2006–2007 సంవత్సరంలో పదో తరగతి చదువుకున్న సహపాఠులు మానవతా విలువలను చాటారు.

వెంకన్న కుటుంబానికి ఆర్థికంగా తోడ్పడాలనే ఉద్దేశంతో మిత్రులు కలిసి రూ.1,23,000 సేకరించారు. ఈ మొత్తాన్ని చిట్యాల పోస్టాఫీస్‌లో వెంకన్న కుమార్తె రేణుక పేరుతో ‘ప్రధాన మంత్రి సుకన్య సమృద్ధి యోజన’ పథకం కింద డిపాజిట్ చేశారు. అనంతరం సంబంధిత పత్రాలను ఆయన కుటుంబ సభ్యులకు అందజేశారు.

ఈ సందర్భంగా, భవిష్యత్తులో కూడా తమకు వీలైనంత సహాయం చేస్తామని కుటుంబానికి హామీ ఇచ్చారు. ఈ కార్యక్రమంలో గుండాల నరేష్ గౌడ్, దమ్మల నరేందర్ రెడ్డి, చిన్నపాక నాగరాజు, జిట్టా శేఖర్, కూరాకుల యాదగిరి తదితరులు పాల్గొన్నారు.

స్నేహబంధం కేవలం జ్ఞాపకాలకే పరిమితం కాకుండా, అవసర సమయంలో అండగా నిలవడం ద్వారా చిట్యాల యువత ఆదర్శంగా నిలిచింది.