సిరిపురం రోడ్ల అభివృద్ధికి వినతి

: పెద్దకాపర్తి నుంచి సిరిపురం వరకు, వెలిమినేడు నుంచి సిరిపురం మీదుగా ఇంద్రపాలనగరం వరకు రహదారులను బీటీ రోడ్లుగా అభివృద్ధి చేయాలని తెలంగాణ తెలుగుదేశం పార్టీ రాష్ట్ర మాజీ కార్యదర్శి రాపోలు నరసింహ, నకిరేకల్ ఎమ్మెల్యే, ప్రభుత్వ విప్ వేముల వీరేశం ను కలిసి వినతిపత్రం సమర్పించారు.

ఈ సందర్భంగా ఆయన మాట్లాడుతూ సిరిపురం గ్రామం దశాబ్దాలుగా చేనేత రంగంలో ప్రత్యేక గుర్తింపు పొందిందని తెలిపారు. ప్రస్తుతం ఈ ప్రాంతం నుంచి కోట్ల రూపాయల విలువైన చేనేత ఉత్పత్తులు మార్కెట్‌కు చేరుతున్నప్పటికీ సరైన రహదారి సదుపాయం లేక పరిశ్రమ అభివృద్ధికి ఆటంకాలు ఎదురవుతున్నాయని పేర్కొన్నారు.

ప్రతిపాదిత రహదారులు అభివృద్ధి చెందితే సిరిపురం గ్రామంతో పాటు పరిసర గ్రామాల ప్రజలకు రవాణా సౌకర్యం మెరుగుపడటమే కాకుండా చేనేత పరిశ్రమకు కొత్త ఊపిరి లభిస్తుందని వివరించారు. ఉపాధి అవకాశాలు పెరిగి వందలాది కుటుంబాలకు ప్రత్యక్షంగా ప్రయోజనం చేకూరుతుందని తెలిపారు.

హైదరాబాద్–విజయవాడ జాతీయ రహదారికి సమీపంలో ఉన్న సిరిపురం భవిష్యత్తులో చేనేత పర్యాటక కేంద్రంగా ఎదిగే అవకాశం ఉందని వినతిపత్రంలో పేర్కొన్నారు.

వినతిపత్రంపై స్పందించిన ఎమ్మెల్యే వేముల వీరేశం రహదారుల అభివృద్ధికి చర్యలు తీసుకుంటానని హామీ ఇచ్చినట్లు తెలిపారు.