ఫీజుల దోపిడీకి వ్యతిరేకంగా విద్యా హక్కుల పోరాటానికి పిలుపు

సూర్యాపేట: విద్యార్థులపై పెరుగుతున్న ఫీజుల భారం, ప్రైవేట్ విద్యాసంస్థల దోపిడీకి వ్యతిరేకంగా పోరాటానికి శ్రీకారం చుడుతూ “ఛలో ఇందిరా పార్క్” కార్యక్రమానికి సంబంధించిన పోస్టర్‌ను తెలంగాణ రాజ్యాధికార పార్టీ రాష్ట్ర ప్రధాన కార్యదర్శి వట్టే జానయ్య యాదవ్ ఆవిష్కరించారు. ఈ సందర్భంగా ఆయన మాట్లాడుతూ ప్రైవేట్ విద్యాసంస్థలు అధిక ఫీజులు వసూలు చేస్తూ తల్లిదండ్రులను తీవ్ర ఆర్థిక ఇబ్బందులకు గురిచేస్తున్నాయని ఆవేదన వ్యక్తం చేశారు. విద్య ప్రతి ఒక్కరికీ మౌలిక హక్కు కావాలని, కానీ ప్రస్తుతం అది వ్యాపారంగా మారిపోవడం బాధాకరమని అన్నారు.

ఫీజుల దోపిడీని అరికట్టేందుకు ప్రభుత్వం కఠిన చర్యలు తీసుకోవాలని డిమాండ్ చేశారు. ఈ నేపథ్యంలో ఏప్రిల్ 26న హైదరాబాద్‌లోని ఇందిరా పార్క్ వద్ద నిర్వహించనున్న “ఫీజుల దోపిడీపై పోరు – విద్యా హక్కు సాధనకై ధర్నా” కార్యక్రమాన్ని విజయవంతం చేయాలని పిలుపునిచ్చారు.విద్యార్థులు, యువత, తల్లిదండ్రులు పెద్ద ఎత్తున ఈ కార్యక్రమంలో పాల్గొని తమ సమస్యలను ప్రభుత్వం దృష్టికి తీసుకెళ్లాలని కోరారు. ఈ కార్యక్రమంలో జిల్లా అధ్యక్షుడు మామిడి అంజయ్య, జిల్లా ప్రధాన కార్యదర్శి మీర్ అక్బర్, మహిళా విభాగం జిల్లా అధ్యక్షురాలు కొన్నే మంజుల గౌడ్, టౌన్ అధ్యక్షుడు కుంభం నాగరాజు, మండలాధ్యక్షులు బొల్లె సైదులు, ఆవుల అంజయ్య, మహిళా నాయకురాలు వర్రె కవిత, బొమ్మగాని సైదులు, వెంకటేశ్, సూపర్ సైదులు, వట్యాల శేఖర్, నెలచర్ల మధు, బానోత్ ఛాంప్ల, పగిళ్ల శరత్, లింగాల సైదులు, వట్టే లింగరాజు, బోడపట్ల మధు తదితరులు పాల్గొన్నారు.