మీర్‌పేటలో భూ ఆక్రమణపై ఫిర్యాదు చేసిన బాధితుడి నుంచి మద్యం సీసాలు డిమాండ్ చేసిన ఎస్సై నాగభూషణం వ్యవహారం సంచలనంగా మారింది. న్యాయం చేయాల్సిన బాధ్యత ఉన్న పోలీసు అధికారి ఇలాంటి చర్యకు పాల్పడటం తీవ్ర విమర్శలకు దారితీసింది.11 గజాల స్థలం వివాదంలో బాధితుడికి సహాయం చేయాల్సింది పోయి, ఫోన్ చేసి మరీ మద్యం పంపించాలని ఒత్తిడి చేసిన ఆడియో బయటకు రావడంతో ఈ విషయం వెలుగులోకి వచ్చింది. ఆ ఆడియో సామాజిక మాధ్యమాల్లో వైరల్ కావడంతో ప్రజల్లో ఆగ్రహం వ్యక్తమైంది.ఈ ఘటనపై ఉన్నతాధికారులు వెంటనే స్పందించారు. శాంతిభద్రతల పరిరక్షణలో కీలక పాత్ర పోషించాల్సిన అధికారి ఇలా వ్యవహరించడాన్ని తీవ్రంగా పరిగణించిన కమిషనర్, ఎస్సై నాగభూషణంను హెడ్ క్వార్టర్స్‌కు అటాచ్ చేస్తూ క్రమశిక్షణ చర్యలు చేపట్టారు.పోలీసు శాఖ ప్రతిష్టను దెబ్బతీసే చర్యలను ఎట్టి పరిస్థితుల్లో సహించబోమని అధికారులు స్పష్టం చేశారు.