ఏప్రిల్ 4న ఎంజీయూలో మెగా జాబ్ మేళా… 1500 ఉద్యోగాలకు అవకాశాలు

యువతకు ఉపాధి అవకాశాలను కల్పించేందుకు మహాత్మా గాంధీ విశ్వవిద్యాలయంలో ఏప్రిల్ 4న మెగా జాబ్ మేళా నిర్వహించనున్నట్లు విశ్వవిద్యాలయ అధికారులు తెలిపారు. ఈ జాబ్ మేళాకు సంబంధించిన పోస్టర్‌ను ఉపకులపతి ఆచార్య ఖాజా అల్తాఫ్ హుస్సేన్ ఆవిష్కరించారు. ఈ సందర్భంగా ప్లేస్మెంట్ సెల్ డైరెక్టర్ డా. హరీష్ కుమార్ మాట్లాడుతూ, ఈ జాబ్ మేళాలో సుమారు 15 ప్రముఖ కంపెనీలు పాల్గొననున్నట్లు తెలిపారు. ఐటీ, ఫార్మా, అగ్రికల్చర్, బ్యాంకింగ్ రంగాలకు చెందిన సంస్థలు ఇందులో భాగమవుతాయని వెల్లడించారు. ఈ జాబ్ మేళా ద్వారా సుమారు 1500 ఉద్యోగాల కోసం ఇంటర్వ్యూలు నిర్వహించనున్నట్లు చెప్పారు.

వివిధ విద్యార్హతలతో ఉన్న అభ్యర్థులకు ఈ జాబ్ మేళా మంచి అవకాశంగా నిలుస్తుందని ఆయన పేర్కొన్నారు. పాలిటెక్నిక్ డిప్లొమా, ఇంజనీరింగ్, బీఎస్సీ అగ్రికల్చర్, బీకాం, బీఫార్మ, ఎంబీఏ, ఎంసీఏ, ఎంఎస్సీ వంటి కోర్సులు పూర్తి చేసిన వారు ఈ జాబ్ మేళాలో పాల్గొనవచ్చు. అలాగే డిగ్రీ చివరి సంవత్సరం చదువుతున్న విద్యార్థులు కూడా రిజిస్ట్రేషన్ చేసుకొని హాజరయ్యే అవకాశం కల్పించామని తెలిపారు.

జాబ్ మేళాలో పాల్గొనదలచిన అభ్యర్థులు పోస్టర్‌లో పొందుపరిచిన క్యూ ఆర్ కోడ్ ద్వారా ముందస్తుగా రిజిస్ట్రేషన్ చేసుకోవాలని సూచించారు. రిజిస్ట్రేషన్ అనంతరం తమ ఒరిజినల్ సర్టిఫికెట్లు, అవసరమైన పత్రాలతో మేళాకు హాజరుకావాలని సూచించారు. ఈ ప్రక్రియ ద్వారా ఎంపికలు పారదర్శకంగా నిర్వహిస్తామని తెలిపారు.ఈ కార్యక్రమానికి సంబంధించి మరిన్ని వివరాల కోసం అభ్యర్థులు 7095922360, 9989260671, 9502771776, 9642676777, 9704810880 నంబర్లను సంప్రదించవచ్చని తెలిపారు. యువత ఈ అవకాశాన్ని సద్వినియోగం చేసుకోవాలని విశ్వవిద్యాలయ అధికారులు పిలుపునిచ్చారు.

ఈ పోస్టర్ ఆవిష్కరణ కార్యక్రమంలో రిజిస్ట్రార్ ఆచార్య కొప్పుల అంజిరెడ్డి, మేనేజ్‌మెంట్ కళాశాల ప్రిన్సిపాల్ ఆచార్య శ్రీదేవి, ఇంజనీరింగ్ డీన్ ఆచార్య రేఖ, ఐక్యూఏసీ డైరెక్టర్ డా. మిర్యాల రమేష్ తదితరులు పాల్గొన్నారు. అలాగే డా. నీలకంఠం శేఖర్, నాగరాజు, సత్యనారాయణ రెడ్డి, వెంకట్, వేణుగోపాల్ రెడ్డి తదితరులు హాజరయ్యారు. ఈ మెగా జాబ్ మేళా ద్వారా వివిధ రంగాల్లో ఉద్యోగ అవకాశాలు అందుబాటులోకి రావడం యువతకు ఒక గొప్ప అవకాశంగా భావిస్తున్నారు. ఉద్యోగాల కోసం ఎదురు చూస్తున్న అభ్యర్థులు ఈ మేళాలో పాల్గొని తమ భవిష్యత్తుకు కొత్త దారులు తెరవాలని అధికారులు సూచించారు.