అంగవైకల్యంతో బాధపడుతూ అర్హత కలిగిన ప్రతి ఒక్కరూ కేంద్ర ప్రభుత్వం అందిస్తున్న యూడీఐడి కార్డులను సద్వినియోగం చేసుకోవాలని ఎల్‌బీనగర్ శాసనసభ్యుడు దేవిరెడ్డి సుధీర్ రెడ్డి పేర్కొన్నారు.

శుక్రవారం ఎల్‌బీనగర్‌లోని ఎమ్మెల్యే క్యాంపు కార్యాలయంలో నిర్వహించిన యూడీఐడి కార్డుల పంపిణీ కార్యక్రమంలో ఆయన పలువురు దివ్యాంగులకు కార్డులను పంపిణీ చేశారు. ఈ సందర్భంగా మాట్లాడిన ఎమ్మెల్యే, దివ్యాంగులకు ప్రభుత్వం అందిస్తున్న సంక్షేమ పథకాలలో యూడీఐడి కార్డు కీలకమని, దీని ద్వారా వివిధ రకాల సౌకర్యాలు, రాయితీలు పొందే అవకాశం ఉంటుందని తెలిపారు.

అర్హులైన ప్రతి దివ్యాంగుడు యూడీఐడి కార్డు కోసం దరఖాస్తు చేసుకొని, ప్రభుత్వ పథకాల ప్రయోజనాలను పొందాలని ఆయన సూచించారు. అలాగే దివ్యాంగుల సంక్షేమం కోసం ప్రభుత్వం కట్టుబడి ఉందని, అవసరమైన సహాయం అందిస్తామని హామీ ఇచ్చారు.

ఈ కార్యక్రమంలో చైతన్యపూరి డివిజన్ యువ నాయకులు చంద్రశేఖర్ రెడ్డి, శివప్రకాష్, గ్రేటర్ హైదరాబాద్ దివ్యాంగుల సంఘం అధ్యక్షుడు మందా బిక్షపతి యాదవ్, ఎల్‌బీనగర్ మహిళా అధ్యక్షురాలు వర్కాల భాగ్యలక్ష్మి, సిద్ధం నర్సింగ్, పద్మ, వెంకటమ్మ తదితరులు పాల్గొన్నారు.