వరంగల్

తెలంగాణ యువతకు భారీగా ఉద్యోగ అవకాశాలు కల్పించే లక్ష్యంతో కేంద్ర నైపుణ్యాభివృద్ధి, వ్యవస్థాపకత మంత్రిత్వ శాఖ ఆధ్వర్యంలో ఈ నెల 27న వరంగల్‌లో ‘కౌశల్ మహోత్సవ్–2026’ నిర్వహించనున్నారు. కాకతీయ ఇన్‌స్టిట్యూట్ ఆఫ్ టెక్నాలజీ అండ్ సైన్స్ (కిట్స్) ప్రాంగణంలో జరగనున్న ఈ మహోత్సవంలో 5 వేలకుపైగా ఉద్యోగ అవకాశాలు అందుబాటులో ఉండనున్నాయి.

ఈ విషయాన్ని గురువారం కిట్స్‌లో నిర్వహించిన విలేకరుల సమావేశంలో మంత్రిత్వ శాఖ డైరెక్టర్ వి.ఎస్. అరవింద్ వెల్లడించారు. వివిధ రంగాలకు చెందిన 50కుపైగా ప్రముఖ సంస్థలు పాల్గొని యువతకు ఉద్యోగాలు కల్పించనున్నట్లు తెలిపారు. నైపుణ్యాలు కలిగిన అభ్యర్థులను పరిశ్రమలతో నేరుగా అనుసంధానం చేయడం, అక్కడికక్కడే ఇంటర్వ్యూలు నిర్వహించడం, ఉపాధి, అప్రెంటిస్‌షిప్ అవకాశాలు కల్పించడమే కార్యక్రమం ప్రధాన ఉద్దేశమని చెప్పారు.

పదో తరగతి, ఇంటర్, ఐటీఐ, డిప్లొమా, డిగ్రీ పూర్తిచేసిన వారితో పాటు వివిధ నైపుణ్యాలు కలిగిన యువత ఈ మహోత్సవంలో పాల్గొనవచ్చన్నారు. తయారీ, రిటైల్, లాజిస్టిక్స్, ఆటోమొబైల్, టెక్స్‌టైల్, ఐటీ, ఆరోగ్య సేవలు, పర్యాటకం, టెలికాం, బ్యాంకింగ్, ఆర్థిక సేవలు తదితర రంగాలకు చెందిన సంస్థలు ఉద్యోగ అవకాశాలు కల్పించనున్నట్లు వెల్లడించారు.

‘‘ప్రతి నైపుణ్యం కలిగిన యువకుడికి అర్థవంతమైన ఉపాధి అవకాశాలు అందించాలన్నదే మా లక్ష్యం. ఉద్యోగ దాతలు, ఉద్యోగార్థులను ఒకే వేదికపైకి తీసుకొచ్చి నైపుణ్యాభివృద్ధి నుంచి ఉపాధి వరకు బలమైన అనుసంధానం కల్పిస్తున్నాం’’ అని వి.ఎస్. అరవింద్ పేర్కొన్నారు.