చిట్యాల మండల కేంద్రంలో మంగళవారం సాయంత్రం కురిసిన భారీ ఈదురుగాలులతో కూడిన వర్షం జనజీవనాన్ని అస్తవ్యస్తం చేసింది. ఒక్కసారిగా కుండపోతగా వర్షం కురవడంతో హైదరాబాద్–విజయవాడ జాతీయ రహదారి 65 పూర్తిగా జలమయమైంది. రహదారిపై మోకాళ్ల లోతు వరకు నీరు నిలిచిపోవడంతో వాహనదారులు తీవ్ర ఇబ్బందులు ఎదుర్కొన్నారు.వర్షపు నీరు భారీగా రోడ్డుపై చేరడంతో వాహనాలు నెమ్మదిగా ఒకదాని వెంట ఒకటి కదలాల్సిన పరిస్థితి నెలకొంది. దీంతో హైవేపై కిలోమీటర్ల మేర వాహనాలు నిలిచిపోయి భారీ ట్రాఫిక్ జామ్ ఏర్పడింది. ముఖ్యంగా ఉద్యోగులు, ప్రయాణికులు గంటల తరబడి ట్రాఫిక్‌లో చిక్కుకుని తీవ్ర అవస్థలు పడ్డారు.ఈదురుగాలుల ధాటికి పలు ప్రాంతాల్లో చెట్ల కొమ్మలు విరిగిపడగా, లోతట్టు ప్రాంతాలు నీట మునిగాయి. డ్రైనేజీలు పొంగిపొర్లడంతో వర్షపు నీరు రహదారులపైకి చేరి రాకపోకలకు అంతరాయం కలిగించింది. అధికారులు అప్రమత్తమై నీటి నిల్వ తొలగింపు చర్యలు చేపట్టారు.