నారాయణఖేడ్ నియోజకవర్గంలోని కల్హేర్ మండల కేంద్రంలో ఉన్న మండల సమాఖ్య కార్యాలయంలో మంగళవారం 99 రోజుల ప్రణాళికలో భాగంగా స్నేహ సంఘాల సభ్యులు, కిషోర బాలికలకు బాల్య వివాహాల నివారణ మరియు మహిళా, బాలల రక్షణకు సంబంధించిన చట్టాలపై ప్రత్యేక అవగాహన కార్యక్రమం నిర్వహించారు. ఈ కార్యక్రమానికి కల్హేర్ ఎస్సై రవిగౌడ్ ముఖ్య అతిథిగా హాజరై బాల్య వివాహాల వల్ల బాలికల భవిష్యత్తుపై పడే ప్రతికూల ప్రభావాలను వివరించారు. చిన్న వయస్సులో వివాహాలు చేయడం చట్ట విరుద్ధమని, అలాంటి ఘటనలు తెలిసిన వెంటనే పోలీసులకు లేదా సంబంధిత అధికారులకు సమాచారం అందించాలని సూచించారు.అలాగే బాలికలు విద్యపై దృష్టి పెట్టి తమ లక్ష్యాలను సాధించాలన్నారు. ప్రభుత్వం బాలికల రక్షణ కోసం అమలు చేస్తున్న చట్టాలు, షీ టీమ్స్ సేవలు, మహిళా హెల్ప్‌లైన్, చైల్డ్ హెల్ప్‌లైన్ వంటి అంశాలపై కూడా అవగాహన కల్పించారు. బాలల హక్కులు, ఆరోగ్య పరిరక్షణ, సురక్షిత జీవనం వంటి అంశాలపై అధికారులు వివరించారు.ఈ కార్యక్రమంలో నారాయణఖేడ్ డివిజన్ షీ టీం ఇంచార్జీ ఏఎస్ఐ తులసిరాం, కానిస్టేబుల్ చాంగుబాయి, చైల్డ్ ప్రొటెక్షన్ శాఖ అధికారి విఠల్ నర్సింలు, మెడికల్ ఆఫీసర్ డాక్టర్ జెబా, ఏపీఎం వంశీకృష్ణ, సీసీలు శైలూ, రాములు, సమత, కల్పన, బేబీ, అకౌంటెంట్ శోభన్ తదితరులు పాల్గొన్నారు. కార్యక్రమంలో పాల్గొన్న బాలికలు అధికారులు చెప్పిన సూచనలను ఆసక్తిగా విన్నారు.