ప్రజలకు అందించిన విశిష్ట సేవలకుగాను 80వ స్వాతంత్ర్య దినోత్సవం సందర్భంగా జిల్లా స్థాయిలో ‘ఉత్తమ అధికారిణి’ అవార్డు అందుకున్న చౌటుప్పల్ మండల తహశీల్దార్ వీరబాయిని ఎస్సీ, ఎస్టీ ఉపాధ్యాయ సంఘం ఆధ్వర్యంలో ఘనంగా సన్మానించారు. శుక్రవారం సంఘం జిల్లా అధ్యక్షుడు బోయ రాములు నాయకత్వంలో ప్రతినిధులు తహశీల్దార్‌ను కలిసి శుభాకాంక్షలు తెలిపారు. మండల ప్రజలకు మరింత మెరుగైన సేవలు అందించాలని ఆకాంక్షించారు. ​ఈ కార్యక్రమంలో ఎస్సీ, ఎస్టీ ఉపాధ్యాయ సంఘం చౌటుప్పల్ మండల ప్రధాన కార్యదర్శి మంకాల లింగస్వామి, పంతంగి ఉప సర్పంచ్ బోయ సదానందం, ఎమ్మార్పీఎస్ జిల్లా ప్రధాన కార్యదర్శి బోయ లింగస్వామి, ఉపాధ్యాయ సంఘం మండల నాయకురాలు ప్రశాంతి, కోటేశ్వర్ తదితరులు పాల్గొన్నారు.