విద్యార్థులకు అండగా టాలెంట్ ఫార్ములా

: ప్రభుత్వ పాఠశాలల్లో చదువుతున్న విద్యార్థుల విద్యాభివృద్ధికి చేయూతనందించే లక్ష్యంతో ఏకలవ్య ఫౌండేషన్ ఆధ్వర్యంలో ఉచిత కిట్ బ్యాగుల పంపిణీ కార్యక్రమం నిర్వహించారు. టాలెంట్ ఫార్ములా అడ్వైజరీ నెట్‌వర్క్ ప్రైవేట్ లిమిటెడ్ ఆర్థిక సహకారంతో మంచాల మండలంలోని పలు ప్రభుత్వ ప్రాథమిక పాఠశాలల్లో చదువుతున్న విద్యార్థులకు కిట్ బ్యాగులను అందజేశారు.

ఈ సందర్భంగా టాలెంట్ ఫార్ములా COO క్రాంతి కిరణ్ మాట్లాడుతూ.. గ్రామీణ ప్రాంత విద్యార్థుల్లో దాగి ఉన్న ప్రతిభను వెలికితీసేందుకు, వారి విద్యాభివృద్ధికి తమ వంతు సహకారం అందించడం సంతృప్తినిస్తుందని అన్నారు. ప్రభుత్వ పాఠశాలల విద్యార్థులకు భవిష్యత్తులోనూ అవసరమైన సహకారం అందిస్తామని తెలిపారు.

ఏకలవ్య ఫౌండేషన్ కార్యదర్శి నరేంద్ర మాట్లాడుతూ.. విద్యార్థుల చదువుకు ప్రోత్సాహం కల్పించేందుకు ఫౌండేషన్ ఆధ్వర్యంలో పలు కార్యక్రమాలు నిర్వహిస్తున్నామని తెలిపారు. ఉచిత కిట్ బ్యాగుల పంపిణీ విద్యార్థుల్లో చదువుపై ఆసక్తిని పెంచుతుందని పేర్కొన్నారు. కార్యక్రమానికి ఆర్థిక సహకారం అందించిన టాలెంట్ ఫార్ములా సంస్థకు కృతజ్ఞతలు తెలిపారు.

కార్యక్రమంలో టాలెంట్ ఫార్ములా ప్రతినిధులు క్రాంతి కిరణ్, క్రిస్, రిచర్డ్, దివ్య, స్నేహ, శ్రీకర్, ఏకలవ్య ఫౌండేషన్ ట్రస్టీ రవీందర్, ప్రాజెక్ట్ మేనేజర్ ప్రశాంత్, పుల్లారెడ్డి, శంకర్, బాల్‌రాజ్, జగదీశ్‌తో పాటు వివిధ ప్రభుత్వ పాఠశాలల ప్రధానోపాధ్యాయులు, ఉపాధ్యాయులు, విద్యార్థులు పాల్గొన్నారు.