నారాయణఖేడ్ నియోజకవర్గం కంగ్టి మండల పరిధిలోని తడ్కల్ గ్రామంలో బుధవారం మహమ్మద్ ప్రవక్త జన్మదిన వేడుకలను మైనార్టీ యువజన సంఘాల ఆధ్వర్యంలో ఘనంగా నిర్వహించారు. ఈ సందర్భంగా గ్రామంలో భారీ ర్యాలీ నిర్వహించగా యువత, మైనార్టీ సంఘాల ప్రతినిధులు, గ్రామ పెద్దలు, ప్రజలు పెద్ద సంఖ్యలో పాల్గొన్నారు. గ్రామంలోని ప్రధాన వీధుల గుండా ర్యాలీ కొనసాగింది. ఈ సందర్భంగా ప్రవక్త మహమ్మద్ బోధించిన శాంతి, సోదరభావం, మానవత్వం, సమానత్వం వంటి విలువలను గుర్తు చేసుకున్నారు. కార్యక్రమానికి కంగ్టి పోలీస్ స్టేషన్ ఎస్సై దుర్గా రెడ్డి హాజరై మాట్లాడుతూ ప్రతి ఒక్కరూ మతపరమైన కార్యక్రమాలను ప్రశాంతంగా నిర్వహించుకోవాలని, అన్ని వర్గాల ప్రజలు పరస్పరం గౌరవించుకుంటూ సోదరభావంతో మెలగాలని సూచించారు. శాంతిభద్రతలకు ఎలాంటి ఇబ్బంది కలగకుండా పోలీసులకు సహకరించాలని కోరారు. ర్యాలీ సందర్భంగా పోలీసులు తగిన భద్రతా ఏర్పాట్లు చేపట్టడంతో కార్యక్రమం ప్రశాంతంగా ముగిసింది. ఈ వేడుకలు గ్రామంలో మత సామరస్యం, సామాజిక ఐక్యతకు ప్రతీకగా నిలిచాయి.