యాదాద్రి భువనగిరి జిల్లా సిరిపురం గ్రామానికి పెద్దకాపర్తి, వెలిమినేడు మార్గాల ద్వారా బీటీ రోడ్లు నిర్మించాలని తెలంగాణ తెలుగుదేశం పార్టీ రాష్ట్ర మాజీ కార్యదర్శి రాపోలు నరసింహా ప్రభుత్వాన్ని కోరారు.

హైదరాబాద్‌కు సుమారు 60 కిలోమీటర్ల దూరంలో, విజయవాడ జాతీయ రహదారికి పెద్దకాపర్తి నుంచి 6 కిలోమీటర్లు, వెలిమినేడు నుంచి 7 కిలోమీటర్ల దూరంలో ఉన్న సిరిపురం గ్రామానికి ఇప్పటికీ బీటీ రోడ్లు లేకపోవడం బాధాకరమని ఆయన అన్నారు. పెద్దకాపర్తి–సిరిపురం రహదారితో పాటు వెలిమినేడు–సిరిపురం–ఇంద్రపాలనగరం మార్గాన్ని బీటీ రహదారిగా అభివృద్ధి చేయాలని ఎన్నో సంవత్సరాలుగా ప్రభుత్వాలు, అధికారులు, ప్రజాప్రతినిధులను కోరుతున్నప్పటికీ ఫలితం కనిపించలేదని పేర్కొన్నారు.

నకిరేకల్ ఎమ్మెల్యే, ప్రభుత్వ విప్ వేముల వీరేశం ప్రత్యేక చొరవ తీసుకుని, రోడ్లు–భవనాల శాఖ మంత్రి కోమటిరెడ్డి వెంకట్‌రెడ్డి దృష్టికి ఈ సమస్యను తీసుకెళ్లి బీటీ రోడ్ల నిర్మాణానికి వెంటనే ఆమోదం పొందేలా చర్యలు తీసుకోవాలని విజ్ఞప్తి చేశారు.

సిరిపురం గ్రామం వ్యవసాయంతో పాటు చేనేత వస్త్రాల ఉత్పత్తికి ప్రసిద్ధి చెందినదని, రహదారులు అభివృద్ధి చెందితే గ్రామంతో పాటు పరిసర ప్రాంతాల ప్రజలకు రవాణా సౌకర్యాలు మెరుగుపడటంతో ఉపాధి, వ్యాపార అవకాశాలు విస్తరిస్తాయని తెలిపారు. చేనేత ఉత్పత్తులకు మార్కెట్ మరింత పెరిగి గ్రామీణ ఆర్థిక వ్యవస్థ బలోపేతం అవుతుందని అభిప్రాయపడ్డారు.

ఈ కార్యక్రమంలో రామన్నపేట టీడీపీ మండల అధ్యక్షుడు మీర్జా ఫజల్ బేగ్, టీఎన్‌ఎస్‌ఎఫ్ రాష్ట్ర మాజీ కార్యదర్శి నకిరేకంటి గణేష్, బీసీ సెల్ మండల అధ్యక్షుడు పున్న వెంకటేశం, మండల ఉపాధ్యక్షుడు బత్తుల సత్యం, పట్టణ అధ్యక్షుడు దిండిగల రాములు, మాజీ గ్రామపంచాయతీ సభ్యుడు సాయిని శేఖర్, జానీ తదితరులు పాల్గొన్నారు.