హైదరాబాద్, ఆగస్టు 3 (ప్రతినిధి): డా. బి.ఆర్. అంబేద్కర్ సార్వత్రిక విశ్వవిద్యాలయం (బ్రౌ) నిర్వహించే ఎంబీఏ, ఎంబీఏ హాస్పిటల్ అండ్ హెల్త్ కేర్ మేనేజ్‌మెంట్ ప్రవేశ పరీక్ష (BRAOUCET) దరఖాస్తుల స్వీకరణకు ఆగస్టు 5 చివరి తేదీగా నిర్ణయించినట్లు విద్యార్థి సేవల విభాగం డైరెక్టర్ డా. వై. వెంకటేశ్వర్లు తెలిపారు.

విశ్వవిద్యాలయంలో ఎంబీఏ లేదా ఎంబీఏ హాస్పిటల్ అండ్ హెల్త్ కేర్ మేనేజ్‌మెంట్ కోర్సుల్లో ప్రవేశం పొందాలంటే తెలంగాణ ఐసెట్ (TS ICET) లేదా బ్రౌసెట్ (BRAOUCET) ప్రవేశ పరీక్షలో అర్హత సాధించడం తప్పనిసరి అని పేర్కొన్నారు.

బ్రౌసెట్‌కు దరఖాస్తు చేసుకునే అభ్యర్థులు డిగ్రీలో కనీసం 50 శాతం మార్కులు సాధించి ఉండాలని, ఎస్సీ, ఎస్టీ అభ్యర్థులకు 45 శాతం మార్కులు ఉంటే సరిపోతుందని వివరించారు.

ప్రవేశ పరీక్షలో అర్హత సాధించిన అభ్యర్థులు అపోలో హాస్పిటల్స్, కిమ్స్, డెక్కన్ మెడికల్ కాలేజ్, ఆర్వీఎం హాస్పిటల్, రెనోవో హాస్పిటల్ తదితర అనుబంధ సంస్థల్లో ఎంబీఏ హాస్పిటల్ అండ్ హెల్త్ కేర్ మేనేజ్‌మెంట్ కోర్సుల్లో ప్రవేశం పొందే అవకాశం ఉంటుందని తెలిపారు. అలాగే విశ్వవిద్యాలయం నిర్వహించే జనరల్ ఎంబీఏ కోర్సులో చేరాలన్నా ఈ ప్రవేశ పరీక్షలో అర్హత తప్పనిసరని స్పష్టం చేశారు.

మరిన్ని వివరాల కోసం 040-23680333, 040-23680555 నంబర్లను సంప్రదించాలని, లేదా విశ్వవిద్యాలయ అధికారిక వెబ్‌సైట్‌ను సందర్శించాలని అధికారులు సూచించారు