చౌటుప్పల్ మోడల్ స్కూల్ నుండి ప్రధాన రహదారి వరకు సీసీ రోడ్డు నిర్మిస్తామని ఎమ్మెల్యే కోమటిరెడ్డి రాజగోపాల్ రెడ్డి ఇచ్చిన హామీని తక్షణమే అమలు చేయాలని భారత విద్యార్థి ఫెడరేషన్ (SFI) చౌటుప్పల్ మండల కమిటీ డిమాండ్ చేసింది.​ ఈ సందర్భంగా ఎస్ఎఫ్ఐ మండల కార్యదర్శి తిగుళ్ళ శ్రీనివాస్ మాట్లాడుతూ.. ఎమ్మెల్యే రెండుసార్లు పాఠశాలను సందర్శించినప్పటికీ రహదారి పనులు ప్రారంభం కాకపోవడం విచారకరమన్నారు. గత నాలుగు సంవత్సరాలుగా విద్యార్థులు పడుతున్న అవస్థలను అధికారులు పూర్తిగా నిర్లక్ష్యం చేస్తున్నారని మండిపడ్డారు. వర్షాకాలంలో ఈ మట్టి రోడ్డు బురదమయంగా మారి విద్యార్థులు జారిపడే ప్రమాదం ఉందన్నారు. ​అధికారులు వెంటనే స్పందించి రోడ్డు పనులను ప్రారంభించాలని, లేకపోతే విద్యార్థులతో కలిసి ఆందోళన కార్యక్రమాలు ఉధృతం చేస్తామని హెచ్చరించారు. ఈ కార్యక్రమంలో నాయకులు ఇరిగి వరుణ్ తేజ్, పోలేపల్లి మల్లేష్, సర్వే అరవింద్, సతీష్ తదితరులు పాల్గొన్నారు.