నారాయణఖేడ్ నియోజకవర్గం కంగ్టి మండలంలోని దెగులవాడి గ్రామంలో సోమవారం జరగాల్సిన గ్రామసభ చివరి నిమిషంలో వాయిదా పడటంతో గ్రామస్తులు తీవ్ర అసంతృప్తి వ్యక్తం చేశారు. గ్రామసభను ఉదయం 10 గంటలకు నిర్వహిస్తామని పంచాయతీ సెక్రెటరీ ముందుగానే వాట్సాప్ గ్రూపులో సమాచారం ఇవ్వడంతో పాటు గ్రామంలో దండోరా కూడా వేయించడంతో గ్రామస్తులు పెద్ద సంఖ్యలో గ్రామపంచాయతీ కార్యాలయానికి చేరుకున్నారు. అయితే సర్పంచ్ పద్మావతికి జ్వరం రావడంతో గ్రామసభను వాయిదా వేసినట్లు పంచాయతీ సెక్రెటరీ ప్రకటించారు. దీంతో ముందస్తు సమాచారం ఇవ్వకుండా ప్రజలను కార్యాలయానికి రప్పించి, అనంతరం సభ వాయిదా పడిందని చెప్పడంపై గ్రామస్తులు ఆగ్రహం వ్యక్తం చేస్తూ పంచాయతీ కార్యాలయం ఎదుట ధర్నా నిర్వహించారు. గ్రామసభ వాయిదా విషయాన్ని ముందుగానే తెలియజేయాల్సి ఉండేదని, ప్రజల సమయాన్ని వృథా చేయడం సరికాదని వారు పేర్కొన్నారు. ఇకపై ఇలాంటి పరిస్థితులు తలెత్తకుండా అధికారులు బాధ్యతాయుతంగా వ్యవహరించాలని, గ్రామసభకు కొత్త తేదీని త్వరగా ప్రకటించాలని గ్రామస్తులు డిమాండ్ చేశారు.