సీపీఎం సీనియర్ నాయకులు, రైతు సంఘం మాజీ డివిజన్ కార్యదర్శి, బస్వాపురం మాజీ సర్పంచ్ కామ్రేడ్ రాసాల వెంకటేష్ ప్రథమ వర్ధంతి సందర్భంగా ఈనెల 6న బస్వాపురం గ్రామంలో నిర్మించిన స్మారక స్థూపాన్ని ఆవిష్కరించనున్నట్లు సీపీఎం రాష్ట్ర కమిటీ సభ్యులు కొండమడుగు నర్సింహ తెలిపారు. ఈ సందర్భంగా నిర్వహించే బహిరంగ సభకు సీపీఎం రాష్ట్ర కార్యదర్శి జాన్ వెస్లీ ముఖ్య అతిథిగా హాజరవుతారని వెల్లడించారు.

సోమవారం భువనగిరిలోని సుందరయ్య భవన్‌లో జిల్లా కమిటీ సభ్యులు దయ్యాల నర్సింహ అధ్యక్షతన జరిగిన సీపీఎం భువనగిరి మండల కమిటీ సమావేశంలో ఆయన మాట్లాడారు. కామ్రేడ్ రాసాల వెంకటేష్ జీవితాంతం ఎర్రజెండా నాయకత్వంలో పేదల హక్కుల కోసం నిరంతరం పోరాడిన నాయకుడని కొనియాడారు.

రైతులు, వ్యవసాయ కార్మికులు, వృత్తిదారుల సమస్యల పరిష్కారానికి అనేక ఉద్యమాలకు నాయకత్వం వహించారని, గ్రామ సర్పంచిగా బస్వాపురం అభివృద్ధికి విశేష కృషి చేశారని పేర్కొన్నారు. ప్రాజెక్టు నిర్వాసితుల సమస్యలు, రైతులకు మార్కెట్ సౌకర్యాల కల్పన వంటి ప్రజా సమస్యలపై నిరంతరం పోరాటం సాగించారని తెలిపారు.

ప్రజా ఉద్యమాలకు అంకితమైన నాయకుడి ఆశయాలను చిరస్థాయిగా నిలిపేందుకు గ్రామంలో స్మారక స్థూపాన్ని నిర్మించామని, ప్రథమ వర్ధంతి సందర్భంగా స్థూపావిష్కరణతో పాటు బహిరంగ సభను నిర్వహిస్తున్నామని చెప్పారు. మండల వ్యాప్తంగా రైతులు, వ్యవసాయ కూలీలు, కార్మికులు, వృత్తిదారులు, గ్రామ ప్రజలు పెద్ద సంఖ్యలో పాల్గొని కార్యక్రమాన్ని విజయవంతం చేయాలని కోరారు.

సభలో సీపీఎం రాష్ట్ర కార్యదర్శి జాన్ వెస్లీతో పాటు కేంద్ర కమిటీ సభ్యులు ఎస్. వీరయ్య, రాష్ట్ర కార్యదర్శివర్గ సభ్యులు, జిల్లా కార్యదర్శి ఎండి. జహంగీర్, జిల్లా నాయకులు పాల్గొని ప్రసంగించనున్నట్లు తెలిపారు. ప్రజానాట్యమండలి కళాకారుల సాంస్కృతిక ప్రదర్శనలు కూడా నిర్వహించనున్నట్లు వెల్లడించారు.

ఈ సమావేశంలో సీపీఎం మండల కార్యదర్శి పల్లెర్ల అంజయ్య, మండల కార్యదర్శివర్గ సభ్యులు అన్నంపట్ల కృష్ణ, కమిటీ సభ్యులు పాండాల మైసయ్య, కొండపురం యాదగిరి తదితరులు పాల్గొన్నారు.