వలిగొండలోని సాధన సొసైటీ, శాంతి నిలయాలను రామన్నపేట సీనియర్ సివిల్ జడ్జి, మండల న్యాయ సేవల కమిటీ ఛైర్మన్ జి. సబిత శనివారం ఆకస్మికంగా సందర్శించారు. ఈ సందర్భంగా ఆయా సంస్థల్లోని నిర్వహణ, పరిశుభ్రత, నివాస సౌకర్యాలు, ఆహార ఏర్పాట్లు, వైద్య సేవలు, మౌలిక వసతులను పరిశీలించారు.

అక్కడ నివసిస్తున్న వారి యోగక్షేమాలను అడిగి తెలుసుకున్న జడ్జి, వారికి అందుతున్న సంరక్షణ, సేవలపై సంస్థల నిర్వాహకులతో మాట్లాడారు. ప్రతి ఒక్కరికీ సురక్షితమైన, పరిశుభ్రమైన, గౌరవప్రదమైన వాతావరణం కల్పించేలా చర్యలు చేపట్టాలని సూచించారు.

ప్రత్యేక అవసరాలు కలిగిన వ్యక్తులు, నిరాశ్రయులు, వృద్ధుల సంక్షేమం పట్ల సమాజంలోని ప్రతి ఒక్కరూ మానవతా దృక్పథంతో ముందుకు వచ్చి సహకరించాలని ఆమె పిలుపునిచ్చారు.

అనంతరం సంస్థల నిర్వాహకులు అందిస్తున్న సేవలను జి. సబిత అభినందిస్తూ, భవిష్యత్తులోనూ ఇదే సేవాభావంతో కొనసాగాలని ఆకాంక్షించారు.