కాలనీ అభివృద్ధికి యువత ముందడుగు.. మార్పు సాధ్యమేనని నిరూపించారు

స్థానిక యువకులు, భక్తులు కలిసి ఆలయ పరిసరాలను శుభ్రం చేసి.. గ్రామంలో స్వచ్ఛతకు ఆదర్శంగా నిలిచారు

వినాయక చవితి సందర్భంగా న్యాల్కల్ మండల కేంద్రంలోని శ్రీ రామలింగేశ్వర స్వామి ఆలయ ప్రాంగణంలో మహాదేవ్ యూత్ సభ్యులు శుభ్రత కార్యక్రమం చేపట్టారు. తమ సొంత ఖర్చులతో ఆలయ పరిసరాలను శుభ్రం చేయడంతో పాటు ప్రజల సౌకర్యం కోసం అవసరమైన పనులను చేపట్టారు.ఆలయ పరిసరాల్లో పిచ్చి మొక్కలు, గడ్డి, చెత్తాచెదారం పెరిగి ఉండటంతో భక్తులకు కొంత అసౌకర్యంగా ఉండేది. ఈ విషయాన్ని గుర్తించిన మహాదేవ్ యూత్ సభ్యులు ముందుకు వచ్చి పిచ్చి మొక్కలు, గడ్డిని తొలగించి పరిసరాలను శుభ్రం చేశారు.అదేవిధంగా కాలనీలోని హ్యాండ్‌బోర్‌కు వెళ్లే మార్గంలో ఉన్న మోరిపై గతంలో ఏర్పాటు చేసిన చిన్న సిమెంట్ బండ దెబ్బతిని ప్రమాదకరంగా మారే పరిస్థితి ఉండేది. దీంతో మహాదేవ్ యూత్ సభ్యులు సొంత ఖర్చులతో మోరిపై పటిష్టమైన సిమెంట్ కవరింగ్ ఏర్పాటు చేశారు.వినాయక చవితి సందర్భంగా ఆలయానికి వచ్చే భక్తులకు పరిశుభ్రమైన, సురక్షితమైన వాతావరణం కల్పించడంతో పాటు ప్రజల సౌకర్యాన్ని దృష్టిలో ఉంచుకుని యువత చేపట్టిన ఈ సేవా కార్యక్రమాన్ని స్థానికులు అభినందించారు.యువత సామాజిక బాధ్యతతో ముందుకు వస్తే గ్రామం, కాలనీ అభివృద్ధిలో మంచి మార్పు సాధ్యమవుతుందని ఈ కార్యక్రమం చాటిచెప్పింది.