హద్నూర్ పోలీస్ స్టేషన్ పరిధిలోని బసంతాపూర్ గ్రామానికి చెందిన 80 ఏళ్ల ఆమీనాబీ సోమవారం ఉదయం తన కూతురు నివాసం ఉన్న వడ్డీ గ్రామానికి వెళ్లి తిరిగి రాకపోవడంతో కుటుంబ సభ్యులు ఆందోళనకు గురయ్యారు. ఆమె ఆచూకీ కోసం కుటుంబ సభ్యులు వెతికినప్పటికీ సమాచారం లభించకపోవడంతో మంగళవారం మధ్యాహ్నం 12 గంటలకు ఆమె మనవడు తాహిర్‌బీ హద్నూర్ పోలీస్ స్టేషన్‌లో ఫిర్యాదు చేశారు. వెంటనే కేసు నమోదు చేసుకున్న పోలీసులు దర్యాప్తు చేపట్టి, కేవలం నాలుగు గంటల్లోనే ఆమీనాబీ ఆచూకీని గుర్తించి కుటుంబ సభ్యులకు సురక్షితంగా అప్పగించారు. పోలీసుల చురుకైన చర్యలతో వృద్ధురాలి ఆచూకీ త్వరగా లభించడంతో కుటుంబ సభ్యులు ఊపిరి పీల్చుకున్నారు. ఈ విషయాన్ని హద్నూర్ ఎస్‌ఐ దోమ సుజిత్ తెలిపారు.