కంగ్టి మండల పరిధిలోని చౌకన్‌పల్లి గ్రామ శివారులో కాలు విరిగి తీవ్రంగా గాయపడి ప్రాణాలతో కొట్టుమిట్టాడుతున్న జింకపిల్లను చౌకన్‌పల్లికి చెందిన యువరైతు రాజు కాపాడి అటవీశాఖ అధికారులకు అప్పగించారు.సోమవారం జింకపిల్లను గుర్తించిన రాజు వెంటనే కంగ్టి వెటర్నరీ ఆస్పత్రికి తరలించగా, స్థానిక ఎల్‌ఎస్‌ఏ వైద్యుడు బసవయ్య స్వామి ప్రథమ చికిత్స అందించి అవసరమైన ఇంజక్షన్లు చేశారు. అనంతరం సిర్గాపూర్ ఫారెస్ట్ సెక్షన్ ఆఫీసర్ రాముకు సమాచారం అందించగా, ఆయన కంగ్టికి చేరుకుని జింకపిల్లను అటవీశాఖ ఆధీనంలోకి తీసుకున్నారు. జింకపిల్లకు మెరుగైన వైద్యం అందించి పూర్తిగా కోలుకున్న తర్వాత నారాయణఖేడ్ పార్కులో సురక్షితంగా వదిలిపెడతామని రాము తెలిపారు. గాయపడిన వన్యప్రాణిని గుర్తించి వెంటనే స్పందించి చికిత్స అందించిన యువరైతు రాజును స్థానికులు అభినందించారు.