ప్రతి ఒక్కరూ రోడ్డు భద్రతా నియమాలు పాటించడం ద్వారానే విలువైన ప్రాణాలను కాపాడుకోవచ్చని చౌటుప్పల్ ఇన్స్పెక్టర్ ఆఫ్ పోలీస్ జి. మన్మథ కుమార్ స్పష్టం చేశారు. బుధవారం చౌటుప్పల్ పోలీస్ స్టేషన్ ఆధ్వర్యంలో లింగోజిగూడెం గ్రామ పరిధిలోని శ్రీనిధి కంపెనీ సమీపంలో 'రోడ్ సేఫ్టీ అవేర్‌నెస్' (రోడ్డు భద్రతా అవగాహన) కార్యక్రమాన్ని నిర్వహించారు. ​ఈ సందర్భంగా ఆయన వాహనదారులను ఉద్దేశించి మాట్లాడుతూ... ద్విచక్ర వాహనదారులు తప్పనిసరిగా హెల్మెట్, కార్ల డ్రైవర్లు సీట్ బెల్ట్ ధరించాలని సూచించారు. అతివేగం, నిర్లక్ష్యపు డ్రైవింగ్ ప్రమాదాలకు ప్రధాన కారణాలని, డ్రైవింగ్ చేసేటప్పుడు ప్రశాంతంగా, ట్రాఫిక్ నిబంధనల ప్రకారం ముందుకు సాగాలని కోరారు. రహదారి భద్రతపై ప్రతి ఒక్కరూ అవగాహన పెంచుకుని, బాధ్యతాయుతంగా వాహనాలు నడిపినప్పుడే రోడ్డు ప్రమాదాలను పూర్తిగా నివారించవచ్చని ఆయన పేర్కొన్నారు. ఈ కార్యక్రమంలో స్థానిక పోలీసులు, వాహనదారులు, ప్రజలు పాల్గొన్నారు.