వలిగొండ స్థానికం ప్రధాన ప్రతినిధి

వలిగొండ మండలంలోని రెడ్లరేపాక గ్రామాన్ని మండల పరిషత్ అభివృద్ధి అధికారి జి. జలెండర్ రెడ్డి నూతనంగా ఎన్నికైన గ్రామ సర్పంచ్ దేశాబోయిన బాలస్వామి, గ్రామ కార్యదర్శితో కలిసి సందర్శించారు.

ఈ సందర్భంగా గ్రామంలోని హైస్కూల్లో నిర్మాణంలో ఉన్న కాంపౌండ్ వాల్ పనులను పరిశీలించారు. పాఠశాల ప్రధానోపాధ్యాయుడు బి. అమృతం తెలిపిన సమస్యలను అడిగి తెలుసుకున్నారు. విద్యార్థులకు అవసరమైన మౌలిక సదుపాయాల కల్పనకు తగిన చర్యలు తీసుకుంటామని హామీ ఇచ్చారు.

అనంతరం ప్రాథమిక పాఠశాల, అంగన్వాడీ కేంద్రాన్ని సందర్శించి సిబ్బంది హాజరు రిజిస్టర్లు, ఆహార నిల్వలు, మధ్యాహ్న భోజన నాణ్యతను పరిశీలించారు. పిల్లలతో నేరుగా మాట్లాడి భోజనం నాణ్యతపై వారి అభిప్రాయాలను తెలుసుకున్నారు. అంగన్వాడీ కేంద్రాల్లో వంద శాతం హాజరు ఉండేలా చర్యలు తీసుకోవాలని సూచించారు.

ప్రభుత్వ పథకాలు లబ్ధిదారులకు పూర్తిస్థాయిలో చేరేలా అధికారులు, సిబ్బంది సమన్వయంతో పనిచేయాలని ఈ సందర్భంగా సూచించారు.