రామన్నపేట మండలంలో నకిలీ సిగరెట్ల దందా రోజురోజుకు పెరుగుతూ ఆందోళన కలిగిస్తోంది. అనుమతి లేకుండా, నాణ్యతలేని సిగరెట్లను కొన్ని అసాంఘిక శక్తులు అసలు బ్రాండ్ల పేర్లతో మార్కెట్లోకి తెచ్చి విక్రయిస్తున్నట్లు సమాచారం. వీటి ద్వారా ప్రజల ఆరోగ్యంతో చెలగాటం ఆడుతున్న పరిస్థితి నెలకొంది.

మార్కెట్లో చలామణి అవుతున్న ఈ నకిలీ సిగరెట్లలో ఉపయోగించే పొగాకు, రసాయనాలు ప్రమాదకరమైనవని నిపుణులు హెచ్చరిస్తున్నారు. ఇవి వినియోగించడం వల్ల ఊపిరితిత్తులు సహా శరీరంలోని ఇతర అవయవాలకు తీవ్రమైన హాని కలిగే ప్రమాదం ఉందని చెబుతున్నారు.

తక్కువ ధరకు లభిస్తున్న ఈ నకిలీ ఉత్పత్తులవైపు ముఖ్యంగా యువత ఆకర్షితులవుతున్నారు. అసలు-నకిలీ తేడా తెలియకుండానే కొనుగోలు చేస్తూ అనారోగ్య సమస్యలను ఆహ్వానించుకుంటున్నారు. ఇప్పటికే సిగరెట్ వినియోగమే ఆరోగ్యానికి హానికరం కాగా, నకిలీ ఉత్పత్తులు మరింత ప్రమాదాన్ని కలిగిస్తున్నాయి.

ఇంత జరుగుతున్నా సంబంధిత అధికారులు పట్టించుకోకపోవడం విమర్శలకు దారి తీస్తోంది. మార్కెట్లో బహిరంగంగానే విక్రయాలు కొనసాగుతున్నప్పటికీ అధికారులు నిమ్మకు నీరెత్తినట్టు వ్యవహరిస్తున్నారని స్థానికులు ఆరోపిస్తున్నారు.

ఇలాంటి అక్రమ వ్యాపారాలను అరికట్టేందుకు తక్షణమే అధికారులు చర్యలు తీసుకోవాలని ప్రజలు కోరుతున్నారు. మండలంలోని కిరాణా దుకాణాలు, ఇతర విక్రయ కేంద్రాల్లో ప్రత్యేక తనిఖీలు నిర్వహించి నకిలీ సిగరెట్ల విక్రయాలను పూర్తిగా నిలిపివేయాలని, అలాగే నకిలీ నిత్యావసర వస్తువులపై కూడా దృష్టి సారించి చట్టవిరుద్ధంగా వ్యవహరిస్తున్న వారిపై కఠిన చర్యలు తీసుకోవాలని విజ్ఞప్తి చేస్తున్నారు.