చిట్యాల మండలం పెద్దకాపర్తి గ్రామంలోని జిల్లా పరిషత్ ఉన్నత పాఠశాల అభివృద్ధికి పూర్వ విద్యార్థి చొరవతో క్యూరియా ఫార్మా సంస్థచేయూతనందించింది. పాఠశాలకు రూ.2.20 లక్షల విలువైన సైన్స్ ల్యాబ్ ఫర్నిచర్‌ను అందించిన సంస్థ ప్రతినిధులను శుక్రవారం పాఠశాల యాజమాన్యం ఘనంగా సన్మానించింది.పాఠశాల ప్రధానోపాధ్యాయులు పీఠం శ్రీధర్ ఆధ్వర్యంలో నిర్వహించిన కార్యక్రమంలో క్యూరియా ఫార్మా కంపెనీ హైదరాబాద్ సైట్ హెడ్ మురళీకృష్ణ, హెచ్‌ఆర్ హెడ్ చిక్కాల వెంకట్, సీనియర్ హెచ్‌ఆర్ బోనగిరి జ్యోతి, సౌమిత్రలకు పూలమాలలు వేసి శాలువాలతో సత్కరించారు.

గత నెలలో గ్రామానికి చెందిన పాఠశాల పూర్వ విద్యార్థి ఆవుల రాఘవేందర్ సూచన మేరకు ఈ సాయం అందినట్లు తెలిపారు. ప్రస్తుతం ఆయన క్యూరియా పరిశ్రమలో పరిశోధనాత్మక శాస్త్రవేత్తగా పనిచేస్తున్నారు. ఆయన చొరవతో పాఠశాలలో సైన్స్ ల్యాబ్ అభివృద్ధికి అవసరమైన ఫర్నిచర్‌ను సంస్థ బహూకరించింది.ఈ సందర్భంగా కంపెనీ ప్రతినిధులు మాట్లాడుతూ గ్రామీణ ప్రాంతాల్లోని ప్రభుత్వ పాఠశాలల అభివృద్ధికి సంస్థ ఎల్లప్పుడూ సహకరిస్తుందని చెప్పారు. విద్యార్థులు మెరుగైన సదుపాయాలతో చదువుకొని ఉన్నతస్థానాలనుఅధిరోహించాలని ఆకాంక్షించారు.

ఈ కార్యక్రమంలో ఆవుల జానయ్య, ఆవుల రాము, తాటి చంద్రమౌళి, గుండెబోయిన నరసింహ, గుజరి యాదగిరి తదితరులు పాల్గొన్నారు.