* ఉపసర్పంచుల హక్కుల పరిరక్షణకే ధర్నా

ఉపసర్పంచుల హక్కుల పరిరక్షణ కోసం హైదరాబాద్‌లోని ఇందిరాపార్క్ ధర్నా చౌక్ వద్ద నిర్వహించనున్న “హలో ఉపసర్పంచ్ – చలో హైదరాబాద్” మహాధర్నాను విజయవంతం చేయాలని యాదాద్రి భువనగిరి జిల్లా ఉపసర్పంచుల ఫోరం అధ్యక్షులు, మందోళ్లగూడెం గ్రామ ఉపసర్పంచ్ సుర్కంటి శ్రీధర్ రెడ్డి పిలుపునిచ్చారు. జిల్లాలోని అన్ని మండలాలు, గ్రామాలకు చెందిన ఉపసర్పంచులు ఈ కార్యక్రమంలో పెద్ద సంఖ్యలో పాల్గొనాలని కోరారు.​ఈ సందర్భంగా ఆయన మాట్లాడుతూ.. ఈ ధర్నా కార్యక్రమం పూర్తిగా ఉపసర్పంచుల హక్కులు, అధికారాల పరిరక్షణ కోసమేనని స్పష్టం చేశారు. ముఖ్యంగా ఉపసర్పంచులకు ఉన్న 'చెక్ పవర్' రద్దు అంశంపై ప్రభుత్వం పునరాలోచన చేయాలని డిమాండ్ చేస్తూ ఈ ఉద్యమాన్ని చేపడుతున్నట్లు పేర్కొన్నారు.ఈ ఉద్యమానికి ఎలాంటి రాజకీయ రంగు లేదు. ఏ రాజకీయ పార్టీకి అనుకూలంగా గానీ, వ్యతిరేకంగా గానీ ఈ కార్యక్రమం నిర్వహించడం లేదు. గ్రామాభివృద్ధిలో కీలక పాత్ర పోషిస్తున్న ఉపసర్పంచుల హక్కులు, గౌరవం, అధికారాల పరిరక్షణే మా ప్రధాన ఉద్దేశం.

​గ్రామ స్వరాజ్య సాధనలో భాగస్వాములైన ఉపసర్పంచులంతా తమ బాధ్యతగా భావించి, రాజకీయాలకు అతీతంగా తరలివచ్చి హక్కుల పోరాటాన్ని విజయవంతం చేయాలని ఆయన ఈ సందర్భంగా విజ్ఞప్తి చేశారు.