ప్రభుత్వ పాఠశాలల్లోనే నాణ్యమైన విద్య లభిస్తుందని, తల్లిదండ్రులంతా తమ పిల్లలను సర్కారు బడుల్లోనే చేర్పించాలని సమాచార హక్కు రక్షణ చట్టం-2005 యాదాద్రి భువనగిరి జిల్లా అధ్యక్షుడు, సామాజిక కార్యకర్త దబ్బటి శేఖర్ కోరారు. చౌటుప్పల్ మండలంలోని నేలపట్ల గ్రామానికి చెందిన ఆయన.. బుధవారం తన కుమారుడు దబ్బటి అభిమన్యును స్థానిక ప్రభుత్వ పాఠశాలలో చేర్పించారు.​ఈ సందర్భంగా శేఖర్ మాట్లాడుతూ.. నేటి రోజుల్లో ప్రైవేటు పాఠశాలలు విద్యను పూర్తిగా వ్యాపారమయంగా మార్చేశాయని ఆవేదన వ్యక్తం చేశారు. కార్పొరేట్ సంస్థలకు దీటుగా ప్రభుత్వ పాఠశాలల్లో అనుభవజ్ఞులైన ఉపాధ్యాయులు, మెరుగైన వసతులు అందుబాటులో ఉన్నాయని, ఈ విషయాన్ని తల్లిదండ్రులు గమనించాలన్నారు. ప్రభుత్వ విద్యను బలోపేతం చేసేందుకు ప్రతి ఒక్కరూ పునరంకితం కావాలని పిలుపునిచ్చారు. ఈ కార్యక్రమంలో పాఠశాల ఉపాధ్యాయులు సుజాత, శ్రీవాణి, శ్వేత తదితరులు పాల్గొన్నారు.