రాష్ట్రంలోని అన్ని నమోదిత న్యాయవాదులకు హెల్త్ కార్డులు జారీ చేయాలని ఆల్ ఇండియా లాయర్స్ యూనియన్ (ఐలు) రాష్ట్ర ఉపాధ్యక్షుడు మామిడి వెంకటరెడ్డి డిమాండ్ చేశారు. జూన్ 20న హైదరాబాద్‌లోని ఇందిరాపార్క్ వద్ద నిర్వహించనున్న న్యాయవాదుల ధర్నా కరపత్రాన్ని గురువారం రామన్నపేట బార్ అసోసియేషన్ హాల్‌లో విడుదల చేశారు. ఈ సందర్భంగా ఆయన మాట్లాడుతూ 2019 తర్వాత నమోదు చేసుకున్న వేలాది మంది న్యాయవాదులు ఇప్పటికీ హెల్త్ కార్డుల ప్రయోజనాలకు దూరంగా ఉన్నారని తెలిపారు. ఆరోగ్య బీమా పరిమితి పెంపుతో పాటు కుటుంబ సభ్యులు, తల్లిదండ్రులను కూడా బీమా పరిధిలోకి తీసుకురావాలని కోరారు. అలాగే రాష్ట్ర వ్యాప్తంగా మరిన్ని ఆసుపత్రులను ఎంపానెల్ చేయడంతో పాటు అడ్వకేట్స్ వెల్ఫేర్ ట్రస్ట్‌కు అదనపు నిధులు కేటాయించాలని డిమాండ్ చేశారు. కార్యక్రమంలో బార్ అసోసియేషన్ అధ్యక్షుడు ఎం.డి. మజీద్, కార్యదర్శి యాదాసు యాదయ్య, ఉపాధ్యక్షుడు సంగిశెట్టి బాలరాజు తదితర న్యాయవాదులు పాల్గొన్నారు.