రామన్నపేట: నిబంధనలకు విరుద్ధంగా తప్పుడు ప్రచారాలతో అడ్మిషన్లు చేపడుతూ విద్యార్థులు, తల్లిదండ్రులను మోసగిస్తున్న పల్లవి మోడల్ స్కూల్ గుర్తింపును రద్దు చేయాలని ఎస్‌ఎఫ్‌ఐ జిల్లా నాయకులు డిమాండ్ చేశారు. ఈ మేరకు జిల్లా విద్యాధికారి బిక్షపతికి వినతిపత్రం సమర్పించారు.ఈ సందర్భంగా ఎస్‌ఎఫ్‌ఐ జిల్లా అధ్యక్షుడు వేముల నాగరాజు, జిల్లా కార్యదర్శి లావుడ్య రాజు మాట్లాడుతూ పాఠశాల యాజమాన్యం ఇష్టారాజ్యంగా ఫీజులు నిర్ణయించి అధిక మొత్తాలు వసూలు చేస్తోందని ఆరోపించారు. సీబీఎస్‌ఈ పేరుతో తప్పుడు ప్రచారం చేస్తూ తల్లిదండ్రులను మోసగిస్తున్నారని విమర్శించారు. ‘మోడల్ స్కూల్’ పేరును అనధికారికంగా వినియోగిస్తూ నిబంధనలను ఉల్లంఘిస్తున్నప్పటికీ విద్యాశాఖ అధికారులు పట్టించుకోవడం లేదని అన్నారు.

గ్రామీణ ప్రాంతమైన రామన్నపేటలో అధిక ఫీజుల సంస్కృతిని తీసుకొచ్చి పేద, మధ్యతరగతి కుటుంబాలపై భారం మోపుతున్నారని పేర్కొన్నారు. కొత్తగా ఏర్పాటు చేసిన పాఠశాలలకు ఒకటో తరగతి నుంచి పదో తరగతి వరకు ఒకేసారి అనుమతులు ఉండవని, అయినప్పటికీ పదో తరగతి వరకు బోధన ఉందంటూ ప్రచారం చేస్తున్నారని ఆరోపించారు.

జిల్లా విద్యాశాఖ అధికారులు వెంటనే పాఠశాలను తనిఖీ చేసి సమగ్ర విచారణ జరిపి తగిన చర్యలు తీసుకోవాలని, లేనిపక్షంలో ఎస్‌ఎఫ్‌ఐ ఆధ్వర్యంలో జిల్లా వ్యాప్తంగా ఆందోళనలు చేపడతామని హెచ్చరించారు.

ఈ కార్యక్రమంలో ఎస్‌ఎఫ్‌ఐ మండల కార్యదర్శి పుట్టల ఉదయ్‌కుమార్, జిల్లా గర్ల్స్‌ కన్వీనర్ ఇందురాణి తదితరులు పాల్గొన్నారు.