చౌటుప్పల్ స్థానికం ప్రధాన ప్రతినిధి

నామినేషన్‌ల స్వీకరణ ప్రక్రియను నిబంధనలకు అనుగుణంగా, పారదర్శకంగా, ఎలాంటి లోపాలకు తావులేకుండా నిర్వహించాలని జిల్లా ఎన్నికల అధికారి, కలెక్టర్ హనుమంత రావు అధికారులను ఆదేశించారు.గురువారం చౌటుప్పల్, పోచంపల్లి మున్సిపల్ కార్యాలయాల్లో రెండో రోజు కొనసాగుతున్న నామినేషన్‌ల స్వీకరణ ప్రక్రియను ఆయన క్షేత్రస్థాయిలో పరిశీలించారు. వార్డు స్థానాలకు దాఖలైన నామినేషన్‌ల సంఖ్యతో పాటు ఇతర వివరాలను అధికారులను అడిగి తెలుసుకున్నారు. నామినేషన్‌ల స్వీకరణ ప్రక్రియ నిబంధనల ప్రకారం సాగుతోందా లేదా అన్న అంశాన్ని సవివరంగా పరిశీలించారు.

నామినేషన్‌ల స్వీకరణ కేంద్రాల్లో ఏర్పాటు చేసిన సదుపాయాలు, సహాయ కేంద్రాలను తనిఖీ చేశారు. అభ్యర్థులు దాఖలు చేసిన నామినేషన్ పత్రాలు, సంబంధిత రిజిస్టర్లను క్షుణ్ణంగా పరిశీలించారు. నామినేషన్‌లు సమర్పించే సమయంలో చిన్నపాటి పొరపాట్లకూ అవకాశం లేకుండా జాగ్రత్తగా పరిశీలించాలని అధికారులకు సూచించారు.అలాగే నామినేషన్ పత్రాలకు జతచేయాల్సిన ధ్రువపత్రాలు పూర్తిగా, సక్రమంగా ఉన్నాయా లేదా అని నిర్ధారించాలని ఆదేశించారు. నామినేషన్‌ల స్వీకరణ ప్రక్రియ సజావుగా సాగేలా అప్రమత్తంగా వ్యవహరించాలని, నిబంధనల అమలులో కట్టుదిట్టంగా ఉండాలని స్పష్టం చేశారు. ఎన్నికల సంబంధిత నివేదికలను నిర్దేశిత విధానంలో సమయానికి నమోదు చేయాలన్నారు.