నార్కెట్‌పల్లి, మే 30: నెంబర్ ప్లేట్లు లేకుండా రోడ్లపై సంచరిస్తున్న వాహనాలపై నార్కెట్‌పల్లి పోలీసులు ఉక్కుపాదం మోపారు. పట్టణ పరిధిలో శనివారం నార్కెట్‌పల్లి పోలీస్ స్టేషన్ ఆధ్వర్యంలో నిర్వహించిన ప్రత్యేక తనిఖీల్లో నిబంధనలకు విరుద్ధంగా సంచరిస్తున్న 11 వాహనాలను గుర్తించి సీజ్ చేశారు.పోలీసులు చేపట్టిన స్పెషల్ డ్రైవ్‌లో రిజిస్ట్రేషన్ నెంబర్ ప్లేట్లు లేకుండా తిరుగుతున్న ద్విచక్ర, ఇతర వాహనాలను తనిఖీ చేసి పోలీస్ స్టేషన్‌కు తరలించారు. సంబంధిత వాహన యజమానులపై మోటారు వాహనాల చట్టం ప్రకారం చర్యలు తీసుకుంటున్నట్లు అధికారులు తెలిపారు.ఈ సందర్భంగా నార్కెట్‌పల్లి ఎస్సై విష్ణు మాట్లాడుతూ, ప్రతి వాహన యజమాని తమ వాహనాలకు చట్టబద్ధమైన రిజిస్ట్రేషన్ నెంబర్ ప్లేట్లు తప్పనిసరిగా ఏర్పాటు చేసుకోవాలని సూచించారు. ట్రాఫిక్ నిబంధనలను ఉల్లంఘిస్తూ నెంబర్ ప్లేట్లు లేకుండా వాహనాలు నడిపితే చట్టపరమైన చర్యలు తప్పవని హెచ్చరించారు.రోడ్డు భద్రత, నేర నియంత్రణ దృష్ట్యా ఇటువంటి ప్రత్యేక తనిఖీలు భవిష్యత్తులో కూడా నిరంతరంగా కొనసాగుతాయని ఎస్సై తెలిపారు. ప్రజలు ట్రాఫిక్ నిబంధనలను పాటిస్తూ పోలీసులకు సహకరించాలని కోరారు.