ప్రజా పాలన ప్రగతి ప్రణాళిక 99 రోజుల కార్యక్రమంలో భాగంగా కొండాపూర్ మండలంలోని తొగరపల్లి గ్రామంలో ఈరోజు “అమ్మ మాట – అంగన్వాడి బాట” కార్యక్రమాన్ని నిర్వహించారు. చిన్నారుల ఆరోగ్యం, పోషకాహారం, ప్రాథమిక విద్య ప్రాముఖ్యతపై అవగాహన కల్పించేందుకు జిల్లా మహిళా మరియు శిశు సంక్షేమ అధికారి కె లలిత కుమారి,జిల్లా బాలల పరిరక్షణ అధికారి, సఖి కేంద్రం ప్రతినిధి కల్పన, గ్రామ సర్పంచ్ దివ్యవాణి, సూపర్వైజర్, సీడీపీఓ, అంగన్వాడీ సిబ్బంది, తల్లులతో కలిసి గ్రామంలో ర్యాలీ నిర్వహించారు. అనంతరం అంగన్వాడీ కేంద్రంలో కొత్తగా నమోదు కావాల్సిన చిన్నారుల ఇళ్లను సందర్శించి తల్లిదండ్రులకు అంగన్వాడీ సేవల ప్రాధాన్యత, పిల్లలకు అందే పోషకాహారం, ఆరోగ్య సంరక్షణ, ప్రీ-స్కూల్ విద్య గురించి వివరించి అర్హులైన పిల్లలను అంగన్వాడీ కేంద్రంలో నమోదు చేయించారు. ప్రతి చిన్నారి అంగన్వాడీ సేవలను పొందేలా తల్లిదండ్రులు సహకరించాలని అధికారులు కోరారు.