సీపీఎం సీనియర్ నాయకుడు బండారు నరసింహ

తెలంగాణ రాష్ట్ర ఐక్య ఉపాధ్యాయ ఫెడరేషన్ (టీఎస్ యూటీఎఫ్) ఉమ్మడి నల్గొండ జిల్లా పూర్వ అధ్యక్షుడు అమరజీవి నల్లబెల్లి బలరాం ఆశయాలను నేటితరం ఆదర్శంగా తీసుకోవాలని సీపీఎం సీనియర్ నాయకుడు బండారు నరసింహ పిలుపునిచ్చారు. ఆదివారం చౌటుప్పల్ మున్సిపల్ కేంద్రంలో సీపీఎం మున్సిపల్ కమిటీ ఆధ్వర్యంలో బలరాం ద్వితీయ వర్ధంతి సభ నిర్వహించారు. ఈ సందర్భంగా బలరాం చిత్రపటానికి పూలమాలలు వేసి ఘనంగా నివాళులర్పించారు. ​అనంతరం బండారు నరసింహ మాట్లాడుతూ.. బలరాం ఉపాధ్యాయ వృత్తిలో ఉంటూ వేలాది మంది విద్యార్థులను క్రమశిక్షణ గల పౌరులుగా తీర్చిదిద్దారని కొనియాడారు. ఉమ్మడి జిల్లాలో యూటీఎఫ్ బలోపేతానికి, ఉపాధ్యాయుల సమస్యల పరిష్కారానికి ఆయన చేసిన ఉద్యమాలు, కృషి మరువలేనివన్నారు. ఈ కార్యక్రమంలో సీపీఎం మున్సిపల్ కార్యదర్శి గోశిక కరుణాకర్, జిల్లా కమిటీ సభ్యులు ఎండీ పాషా, నాయకులు బత్తుల దాసు, గోపగోని లక్ష్మణ్ గౌడ్, ఎండీ ఖయ్యూమ్, పెరియార్, మహమ్మద్ పాషా, నల్లబెల్లి కిషన్, అనిల్, గంట శంకర్ రెడ్డి, మహేష్, డాక్టర్ నల్లబెల్లి దీప్తి, కుటుంబ సభ్యులు పాల్గొన్నారు.