నారాయణఖేడ్ నియోజకవర్గం కంగ్టి మండల పరిధిలోని ముర్కుంజాల్ ప్రాథమిక పాఠశాలలో ఉపాధ్యాయులు సమయానికి పాఠశాలకు రాకపోవడంతో విద్యార్థులు పాఠశాల బయట, ప్రధాన రోడ్డుపై తిరుగుతున్నారని గ్రామ సర్పంచ్ సారంగి అనూష ఆవేదన వ్యక్తం చేశారు. బుధవారం సర్పంచ్ సారంగి అనూషతో పాటు సాయ గౌడ్ పాఠశాలను సందర్శించి పరిస్థితిని పరిశీలించారు. ఈ సందర్భంగా విద్యార్థులకు కనీస ప్రాథమిక విద్య కూడా సక్రమంగా అందడం లేదని, అ, ఆ, ఇ, ఈ వంటి అక్షరాలను కూడా సరిగా చదవలేని పరిస్థితి ఉందని సర్పంచ్ ఆవేదన వ్యక్తం చేశారు.ఉపాధ్యాయులు బాధ్యతగా విధులు నిర్వహించి విద్యార్థులకు నాణ్యమైన విద్య అందించాలని సూచించారు. పాఠశాల సమస్యలపై డీఓ, ఎంఈఓలకు పలుమార్లు సమాచారం అందించినా పట్టించుకోవడం లేదని ఆరోపించారు. అంతేకాకుండా ప్రభుత్వం నిర్దేశించిన మెనూ ప్రకారం విద్యార్థులకు అందించాల్సిన పండ్లు, గుడ్లు, బిస్కెట్లు వంటి పౌష్టికాహారం కూడా సక్రమంగా అందడం లేదని తెలిపారు. విద్యార్థుల భద్రత, విద్య, పౌష్టికాహారంపై అధికారులు తక్షణమే దృష్టి సారించి సమస్యలను పరిష్కరించాలని సర్పంచ్ సారంగి అనూష డిమాండ్ చేశారు.