నల్లగొండ జిల్లా: మిషన్ భగీరథ కాంట్రాక్ట్ కార్మికులకు పెండింగ్‌లో ఉన్న వేతనాలను తక్షణమే చెల్లించడంతో పాటు, ప్రభుత్వం ప్రకటించిన పెంచిన వేతనాలను జనవరి నెల నుంచే అమలు చేయాలని సిఐటియు (CITU) జిల్లా ఉపాధ్యక్షులు దండెంపల్లి సత్తయ్య ప్రభుత్వాన్ని డిమాండ్ చేశారు. సోమవారం దొడ్డి కొమరయ్య భవన్‌లో తెలంగాణ మిషన్ భగీరథ కాంట్రాక్ట్ వర్కర్స్ అండ్ ఎంప్లాయిస్ యూనియన్ నల్లగొండ జిల్లా కమిటీ సమావేశం జరిగింది. ఈ సమావేశానికి ముఖ్య అతిథిగా హాజరైన సత్తయ్య మాట్లాడుతూ, మిషన్ భగీరథ పథకం ద్వారా నల్లగొండ జిల్లాలో సుమారు 690 గ్రామాలకు తాగునీరు అందిస్తున్న కార్మికులు తీవ్రమైన ఆర్థిక ఇబ్బందులు ఎదుర్కొంటున్నారని ఆవేదన వ్యక్తం చేశారు.

కార్మికులకు నెలకు కేవలం రూ.10,000 నుండి రూ.12,000 వరకు మాత్రమే వేతనాలు ఇస్తున్నారని, అవి కూడా ప్రతి నెల చెల్లించకుండా ఆరు నెలలకు ఒకసారి చెల్లించడం అన్యాయమని అన్నారు. కార్మికుల శ్రమకు తగిన గౌరవం ఇవ్వకుండా వేతనాల చెల్లింపులో ఆలస్యం చేయడం వారి జీవనోపాధిపై తీవ్ర ప్రభావం చూపుతోందని తెలిపారు.

ప్రతి నెల 5వ తేదీలోపు వేతనాలు చెల్లించేలా చర్యలు తీసుకోవాలని, జిల్లా అధికారుల సమక్షంలో కాంట్రాక్టర్లతో కుదిరిన ఒప్పందం ప్రకారం పెంచిన వేతనాలను వెంటనే అమలు చేయాలని ఆయన స్పష్టం చేశారు. అంతేకాకుండా, పెండింగ్‌లో ఉన్న వేతనాలను ఆలస్యం చేయకుండా వెంటనే విడుదల చేయాలని డిమాండ్ చేశారు. రాష్ట్ర ప్రభుత్వం కాంట్రాక్ట్ కార్మికుల ఉద్యోగ భద్రత కోసం ప్రత్యేక కార్పొరేషన్ ఏర్పాటు చేస్తామని ప్రకటించిన విషయాన్ని గుర్తుచేస్తూ, ఆ కార్పొరేషన్‌లో మిషన్ భగీరథ కార్మికులను కూడా చేర్చాలని కోరారు. దీంతో వారి జీవన పరిస్థితులు మెరుగుపడతాయని అభిప్రాయపడ్డారు.

అదేవిధంగా, రానున్న మే 1 ప్రపంచ కార్మిక దినోత్సవాన్ని పురస్కరించుకొని మిషన్ భగీరథ వాటర్ ప్లాంట్ల వద్ద సిఐటియు జెండాలు ఎగురవేసి కార్మిక ఐక్యతను చాటాలని పిలుపునిచ్చారు. ఈ సమావేశం తెలంగాణ మిషన్ భగీరథ కాంట్రాక్ట్ వర్కర్స్ అండ్ ఎంప్లాయిస్ యూనియన్ నల్లగొండ జిల్లా అధ్యక్షులు జంజరాల శ్రీనివాస్ అధ్యక్షతన జరిగింది. కార్యక్రమంలో జిల్లా కార్యదర్శి కుడ్తల సైదులు, ఉపాధ్యక్షులు నేలపట్ల అశోక్, కోశాధికారి ఉయ్యాల మురళి, నాయకులు శంకర్, ఆంజనేయులు, పరమేష్, కృష్ణ, సైదులు తదితరులు పాల్గొన్నారు. కార్మికుల సమస్యలను వెంటనే పరిష్కరించాలని, లేకపోతే పెద్ద ఎత్తున ఉద్యమాలు చేపడతామని నాయకులు హెచ్చరించారు.