నలుగురిపై కేసులు నమోదు.. ఇద్దరి అరెస్ట్.. 600 లీటర్ల బెల్లం ఊట ధ్వంసం

దేవరకొండ, జూలై 1: నల్లగొండ జిల్లా దేవరకొండ మండలంలో అక్రమ మద్యం తయారీ, విక్రయాలపై ఎక్సైజ్ శాఖ ఉక్కుపాదం మోపింది. దేవరకొండ ఎక్సైజ్ స్టేషన్ హౌస్ ఆఫీసర్ (ఎస్‌హెచ్‌ఓ) ఆధ్వర్యంలో బుధవారం నిర్వహించిన ప్రత్యేక దాడుల్లో నాటుసారా తయారీ, విక్రయాలకు పాల్పడుతున్న వ్యక్తులను గుర్తించి కేసులు నమోదు చేశారు.

మండల పరిధిలోని కొర్ర తండా, జటావత్ తండాలలో ఎక్సైజ్ పోలీసులు విస్తృత తనిఖీలు చేపట్టగా, నాటుసారా తయారీ, విక్రయాలకు సంబంధించిన నాలుగు కేసులు వెలుగుచూశాయి. ఈ సందర్భంగా ఇద్దరు నిందితులను అరెస్ట్ చేసి, వారి వద్ద నుంచి ఆరు లీటర్ల నాటుసారాను స్వాధీనం చేసుకున్నారు.

అదే సమయంలో నాటుసారా తయారీకి సిద్ధంగా ఉంచిన సుమారు 600 లీటర్ల బెల్లం ఊట (ఎఫ్‌జే వాష్)ను గుర్తించిన అధికారులు, దానిని ఘటనా స్థలంలోనే ధ్వంసం చేశారు. అక్రమ మద్యం తయారీ కేంద్రాలపై నిరంతర నిఘా కొనసాగిస్తున్నామని, ప్రజల ప్రాణాలకు ముప్పు కలిగించే నాటుసారా తయారీ, విక్రయాలను ఏమాత్రం ఉపేక్షించబోమని ఎక్సైజ్ అధికారులు స్పష్టం చేశారు.

గ్రామాలు, తండాల్లో నాటుసారా తయారీ, విక్రయం లేదా రవాణా జరుగుతున్నట్లు సమాచారం ఉంటే వెంటనే ఎక్సైజ్ లేదా పోలీసు అధికారులకు తెలియజేయాలని ప్రజలకు విజ్ఞప్తి చేశారు. అక్రమ మద్యం నిర్మూలనకు ప్రత్యేక చర్యలు కొనసాగుతాయని అధికారులు తెలిపారు.