హైదరాబాద్: తెలంగాణ సైబర్ సెక్యూరిటీ బ్యూరో ఇన్స్పెక్టర్ బత్తుల మహేందర్ లంచం కేసులో అరెస్టు కావడంతో పోలీసు శాఖలో తీవ్ర చర్చకు దారితీసింది. రూ.4 లక్షలు లంచం తీసుకుంటూ ఏసీబీకి చిక్కిన ఘటన అనంతరం ఆయన నివాసంలో నిర్వహించిన సోదాల్లో భారీ మొత్తంలో నగదు, బంగారు ఆభరణాలు, ఆస్తి పత్రాలు లభించడం సంచలనంగా మారింది.

ఈ నేపథ్యంలో మహేందర్‌కు సంబంధించిన ఆస్తుల వివరాలు, బ్యాంకు లావాదేవీలు, ఇతర పెట్టుబడులపై ఏసీబీ అధికారులు లోతైన విచారణ చేపట్టినట్లు సమాచారం. ఆయన గతంలో నిర్వహించిన విధులు, విచారించిన కేసులు, అనుమానాస్పద ఆర్థిక లావాదేవీలపై కూడా దృష్టి సారించినట్లు తెలుస్తోంది.

ఈ ఘటనతో సైబర్ క్రైమ్ విభాగంలో పనిచేస్తున్న అధికారుల పనితీరుపై కూడా ఉన్నతాధికారులు సమీక్ష ప్రారంభించినట్లు సమాచారం. ప్రభుత్వ ఉద్యోగులు అవినీతికి పాల్పడితే కఠిన చర్యలు తప్పవని ఏసీబీ అధికారులు హెచ్చరిస్తున్నారు.

లంచం కేసులో అరెస్టైన ఇన్స్పెక్టర్‌పై అవినీతి నిరోధక చట్టం కింద కేసు నమోదు చేసి దర్యాప్తు కొనసాగిస్తున్నారు. ఈ వ్యవహారం తెలంగాణ పోలీసు వర్గాల్లో తీవ్ర చర్చనీయాంశంగా మారింది.