క్షేత్రస్థాయి సందర్శన శిక్షణ అధికారులు ప్రజల సమస్యలను ప్రత్యక్షంగా అర్థం చేసుకోవడానికి అత్యంత కీలకమని జిల్లా కలెక్టర్ పి. ప్రావీణ్య తెలిపారు.గ్రామ స్థాయిలో పథకాల అమలు, ప్రజల జీవన విధానం, అభివృద్ధి కార్యక్రమాల ప్రభావం వంటి అంశాలను నిశితంగా పరిశీలించిన తర్వాతే భవిష్యత్తులో సమర్థవంతంగా ప్రజలకు సేవలు అందించగలమని ఆయన పేర్కొన్నారు.రెండు రోజుల శిక్షణలో భాగంగా జిల్లాకు చెందిన బడంపేట,సజ్జాపూర్,అనంతసాగర్, మల్లేపల్లి, గొంగళూరు, బస్వాపూర్, అరూర్,వెల్టూర్,అల్గోల్, మల్ చల్మా గ్రామాలను ఆరు శాఖలకు చెందిన 60 మంది గ్రూప్-వన్ అధికారులు సందర్శించి శిక్షణను పూర్తి చేశారు.అనంతరం బుధవారం కలెక్టరేట్‌లో జిల్లా కలెక్టర్‌ను మర్యాదపూర్వకంగా కలిశారు.గ్రామాల్లో పాఠశాలలు, పీహెచ్‌సీలు, అంగన్వాడీ కేంద్రాలు, అమలవుతున్న ప్రభుత్వ పథకాలు, ఎన్‌ఆర్‌ఈజీఎస్ పనులను పరిశీలించిన అధికారులు గ్రామ ప్రజలు, స్వయం సహాయక సంఘాల మహిళలతో ముఖాముఖి మాట్లాడి వారి అభిప్రాయాలను తెలుసుకున్నారు.కలెక్టరేట్ సమావేశ మందిరంలో జిల్లా కలెక్టర్ మాట్లాడుతూ, గ్రామ మరియు జిల్లా అభివృద్ధిలో అధికారుల పాత్ర కీలకమని, ప్రజలతో మమేకమై సమస్యలను పరిష్కరించడానికి కార్యనిర్వాహకంగా పనిచేయాలని సూచించారు. పరిపాలనలో పారదర్శకత, సమర్థత అత్యంత ముఖ్యమని వివరించారు.ఈ సందర్భంగా పలువురు గ్రూప్-వన్ అధికారులు గ్రామాల్లో ‘ఇందిరా మహిళ’ కార్యక్రమం సమర్థవంతంగా అమలవుతోందని, స్వయం సహాయక సంఘాల మహిళలు రుణాల ద్వారా ఆర్థికంగా అభివృద్ధి చెందుతున్నట్లు ప్రత్యక్షంగా గమనించారని తెలిపారు.అలాగే గ్రామాల్లో మౌలిక సదుపాయాలు మెరుగ్గా ఉన్నాయని, అభివృద్ధి బేషరము సాధించబడిందని కూడా పేర్కొన్నారు. ఈ పర్యటన తమకు ఎంతో ఉపయోగకరంగా నిలిచిందని అధికారులు తెలిపారు.ఈ కార్యక్రమంలో అడిషనల్ కలెక్టర్ పాండు, నారాయణఖేడ్ సబ్ కలెక్టర్ ఉమా హారతి, జడ్పీ సీఈవో జానకి రెడ్డి తదితరులు పాల్గొన్నారు.