మరో 15 రోజుల్లో రిజర్వాయర్లలో నీళ్లు అయిపోతాయని హెచ్చరిక

గోదావరి జలాలు సముద్రంలోకి పోతున్నా ప్రభుత్వం పట్టించుకోవడం లేదని విమర్శ

కాళేశ్వరం ప్రాజెక్టుపై బహిరంగ చర్చకు సిద్ధం.. ఉత్తమ్‌కు జగదీష్ రెడ్డి సవాల్

నల్గొండ జిల్లాలో నెలకొన్న కరువు పరిస్థితులను ఎదుర్కోవడంలో రాష్ట్ర ప్రభుత్వం పూర్తిగా విఫలమైందని మాజీ మంత్రి, సూర్యాపేట ఎమ్మెల్యే గుంటకండ్ల జగదీష్ రెడ్డి తీవ్ర విమర్శలు చేశారు. నల్గొండ జిల్లా బీఆర్ఎస్ పార్టీ కార్యాలయంలో సోమవారం ఏర్పాటు చేసిన విలేకరుల సమావేశంలో ఆయన మాట్లాడుతూ ప్రభుత్వం కరువు నివారణపై చిత్తశుద్ధితో పనిచేయడం లేదని ఆరోపించారు.

రాష్ట్రంలోని రిజర్వాయర్లలో మరో 15 రోజులకు సరిపడా మాత్రమే నీటి నిల్వలు ఉన్నాయని, ఇప్పటికైనా ప్రభుత్వం అత్యవసర చర్యలు చేపట్టకపోతే నల్గొండతో పాటు హైదరాబాద్ నగరానికీ తాగునీటి ఎద్దడి తప్పదని హెచ్చరించారు. గోదావరి నదిలో భారీగా నీరు సముద్రంలోకి వృథాగా వెళ్తున్నప్పటికీ, ఆ నీటిని వినియోగించాలనే ఆలోచన ప్రభుత్వానికి లేదని విమర్శించారు.

తమ ప్రభుత్వ హయాంలో తీవ్రమైన కరువు పరిస్థితులు ఉన్నప్పటికీ నాగార్జునసాగర్ ఆయకట్టు రైతులకు సాగునీరు అందించామని జగదీష్ రెడ్డి గుర్తు చేశారు. మిషన్ భగీరథ ద్వారా తాగునీటి సరఫరా కూడా సమర్థవంతంగా నిర్వహించామని, ప్రస్తుతం ఆ పథకం నిర్వహణలో ప్రభుత్వం పూర్తిగా విఫలమైందని ఆరోపించారు. ప్రజలకు తాగునీరు కూడా సక్రమంగా అందడం లేదని అన్నారు.

వ్యవసాయ రంగంపై కూడా ప్రభుత్వం నిర్లక్ష్యంగా వ్యవహరిస్తోందని ఆయన విమర్శించారు. రైతులకు సమయానికి విత్తనాలు, ఎరువులు అందుబాటులో లేవని, ఇంకుడు గుంతల పేరుతో రైతులను మభ్యపెడుతున్నారని ఆరోపించారు. రోజుకు 12 గంటల నాణ్యమైన విద్యుత్ సరఫరా కూడా రైతులకు అందడం లేదని పేర్కొన్నారు.

సాగర్ ప్రాజెక్టు నుంచి 50 టీఎంసీల నీటిని ఆంధ్రప్రదేశ్‌కు తరలించినప్పటికీ తెలంగాణ ప్రభుత్వం స్పందించలేదని జగదీష్ రెడ్డి ఆరోపించారు. ఇప్పటి వరకు సుమారు 150 టీఎంసీల నీటిని సముద్రం పాలు చేశారని, ఇది ప్రభుత్వ నిర్లక్ష్యానికి నిదర్శనమని విమర్శించారు. జిల్లా సమీక్ష సమావేశాల పేరుతో ప్రభుత్వం కేవలం ప్రచారం చేసుకుంటోందని, ముందస్తు ప్రణాళికలు, కార్యాచరణ లోపించాయని అన్నారు.

ఇరిగేషన్ మంత్రి ఉత్తమ్ కుమార్ రెడ్డిపై కూడా జగదీష్ రెడ్డి తీవ్ర వ్యాఖ్యలు చేశారు. నీటి నిర్వహణపై మంత్రికి సరైన అవగాహన లేదని, ఆయన చేస్తున్న వ్యాఖ్యలు వాస్తవాలకు విరుద్ధమని ఆరోపించారు. కాళేశ్వరం ప్రాజెక్టుపై ఎక్కడైనా, ఎప్పుడైనా బహిరంగ చర్చకు తాను సిద్ధమని, దమ్ముంటే మంత్రి ఉత్తమ్ కుమార్ రెడ్డి ముందుకు రావాలని సవాల్ విసిరారు. కన్నెపల్లి పంపులు, సుందిళ్ల, అన్నారం బ్యారేజీల ద్వారా రాష్ట్రానికి అవసరమైన నీటిని ఎలా అందించవచ్చో ఆధారాలతో నిరూపిస్తానని చెప్పారు.

ప్రస్తుత పరిస్థితుల్లో ఇరిగేషన్ మంత్రి తన పదవికి అనర్హుడని, వెంటనే రాజీనామా చేయాలని జగదీష్ రెడ్డి డిమాండ్ చేశారు. రాష్ట్రంలో కరువు పరిస్థితులు మరింత విషమించకుండా ప్రభుత్వం వెంటనే కార్యాచరణ రూపొందించి తాగునీరు, సాగునీటి సమస్యల పరిష్కారానికి అత్యవసర చర్యలు చేపట్టాలని ఆయన కోరారు.