దేశంలో బొగ్గు, లిగ్నైట్ గ్యాసిఫికేషన్ ప్రాజెక్టుల అభివృద్ధికి ఊతమిచ్చే లక్ష్యంతో కేంద్ర బొగ్గు మంత్రిత్వ శాఖ జూన్‌ 11న హైదరాబాద్‌లో రోడ్‌షో నిర్వహించనుంది. ఇటీవల న్యూఢిల్లీలో నిర్వహించిన రోడ్‌షోకు పరిశ్రమల నుంచి లభించిన విశేష స్పందనతో ఈ కార్యక్రమాన్ని మరింత విస్తృతంగా నిర్వహిస్తున్నట్లు మంత్రిత్వ శాఖ వెల్లడించింది.

ఈ కార్యక్రమానికి కేంద్ర బొగ్గు, గనుల శాఖ మంత్రి జి. కిషన్‌రెడ్డి ముఖ్య అతిథిగా, కేంద్ర సహాయ మంత్రి సతీష్‌ చంద్ర దూబే గౌరవ అతిథిగా హాజరుకానున్నారు. బొగ్గు శాఖ కార్యదర్శి విక్రమ్‌ దేవ్‌ దత్‌, అదనపు కార్యదర్శి సనోజ్‌ కుమార్‌ ఝాతో పాటు కేంద్ర, రాష్ట్ర ప్రభుత్వాల ప్రతినిధులు, బొగ్గు–లిగ్నైట్ సంస్థల అధికారులు, పారిశ్రామికవేత్తలు, పెట్టుబడిదారులు, సాంకేతిక నిపుణులు పాల్గొంటారు.

ఇంధన రంగంలో కీలక అడుగు

బొగ్గును ‘సిన్‌గ్యాస్‌’గా మారుస్తూ మిథనాల్‌, అమ్మోనియం నైట్రేట్‌, సింథటిక్‌ సహజవాయువు, ఇతర పారిశ్రామిక రసాయనాల తయారీకి వినియోగించే గ్యాసిఫికేషన్ సాంకేతికతకు కేంద్ర ప్రభుత్వం ప్రాధాన్యం ఇస్తోంది. దేశీయ బొగ్గు వనరుల వినియోగాన్ని పెంచడం, దిగుమతులపై ఆధారాన్ని తగ్గించడం, ఇంధన భద్రతను బలోపేతం చేయడం దీని ప్రధాన ఉద్దేశమని అధికారులు తెలిపారు.

పరిశ్రమలకు అవకాశాల వేదిక

విధానపరమైన మద్దతు, సాంకేతిక ఆవిష్కరణలు, పెట్టుబడి అవకాశాలు, ప్రాజెక్టుల అమలు వ్యూహాలపై చర్చించేందుకు ఈ రోడ్‌షో వేదిక కానుంది. దేశవ్యాప్తంగా గ్యాసిఫికేషన్ ప్రాజెక్టుల అభివృద్ధిని వేగవంతం చేసేందుకు విధాన రూపకర్తలు, పరిశ్రమల ప్రతినిధులు, పెట్టుబడిదారుల మధ్య భాగస్వామ్యాలను పెంపొందించే అవకాశం కల్పించనుంది.

ఆత్మనిర్భర్ భారత్‌కు బలం.

బొగ్గు గ్యాసిఫికేషన్ రంగంలో బలమైన వ్యవస్థను నెలకొల్పడం ద్వారా ఆవిష్కరణలు, పరిశ్రమల భాగస్వామ్యాన్ని ప్రోత్సహించడంతో పాటు ఇంధన భద్రత, వనరుల సమర్థ వినియోగం, పారిశ్రామిక వృద్ధికి తోడ్పాటునందించడమే లక్ష్యమని కేంద్ర బొగ్గు మంత్రిత్వ శాఖ పేర్కొంది. ఈ కార్యక్రమం ఆత్మనిర్భర్ భారత్‌ లక్ష్య సాధనకు మరో కీలక అడుగుగా భావిస్తున్నారు.